Taleh Bağırzadə və Abbas Huseyn`i ənəhardə aksiya bino kardəşone.

Mısılmonon İbemonə Hərəkati sədr Taleh Bağırzadə və ım təşkilati navğədəmonədə qıley Abbas Huseyn`i Ğobustani zindonxonədə ənəhardə aksiya bino kardəşone. Im məlumat AXCP sədri muavin Zumrud Yağmuri pevolo kardəşe.

“Azadlıq.info” bə çey votəyon əsasən xəbə doəşe ki, Zumrudi bə Abbas Huseyni ailə zanq kardəşe. Əvon bey votəşone ki, Abbasi de telefoni qəpədə bəvon rosnieş zınə ki, Taleh 5 ruje, ğida ğəbul kardeku imtina kardedə. Abbasən 2 ruje bə ım aksiya umjən qıniə. Zindonədə bəvon zulm və işqəncon dəvom kardedə. Ey ıştə qəp bə orəx rosnie zınəşni, zindoni nəzarətəkon telefon çey dasto səşone.

Peşo məlum bıə ki, zindonxonə mudiriyyəti Taleh Bağırzadə de telefoni qəp je huğuğiku məhrun kardəşe. Isət çey de xarici aləmi əlağə nişe. Bə ım koy zindonxonə rəis Aftandil Ağayev şəxsən nəzarət kardedə. Çimi bə navən Bağırzadə bə çey munasibətədə ğeyri-ğanuniə rəftori dəvom karde təğdirədə bə ənəhardə aksiya dast ğande məcburiyyətədə mande bəyon kardəşbe.

Zindononədə bə dini fəalon jıqo zulm karde hiçən təsaduf ni, məqəvuji hokuməti bə dindaron əleyh bardə siyasəti qıley vəsiləy. Huğuğə mudafiəkar Oqtay Quləliyevi ıştə “Fasebook” səhifədə nıvıştəşe ki, DƏX 7 manq bə nav Mısılmonon İbemonə Hərəkati uzv Ağa Sərxani de qolulə jeşe kıştışe. Tosə ısət çey meyti bə çey ailə dodənin. Bə çey jimoni həmro təzyiğ nişon dodən ki, çeyku imtina bıko.

Məmlkətədə bə dini ədəbiyyati nəşr və pevolo karde səpeyən senzira bərğərore. Bə Dini Təşkilaton dair Devlətə Komitə sədr Mubariz Ğurbanli votəşe ki, dəvardə sori 52 nomədə dini ədəbiyyati bə keşvər varde və səşone. Bə 26 nomədə dini məzmuninə kitobi nəşri icazə doəşon ni.