Bokuədə tosə 2023-minə sori “Formula-1” musabiğat dəbəvarde
“Formula-1” Qran Pri musabiğati tosə 2023-minə sori Bokuədə dəbəvunen. Fevralə manqi 5-ədə vərzeşi vəzir Azad Rəhimovi de “Formula-1 Group” şirkəti sər direktor Çeyz Kerri bə bı barədə muğavilə ğol kəşəşone.
Çimi bə nav Prezident İlham Əliyevi Çeyz Kerri ğəbul kardışe. “Sputnik Azərbaycan” sayti xəbə doşe ki, devləti sərdari bı didorədə votışe ki, “Formula-1” musabiğati Bokuədə dəvunie xariciə turiston bə məmləkət cəlb kardeədə əhəmiyyətinə koe. İmən iğtisadiyyatədə bo hırdə biznes strukturon inkişafi əlavə stimulon bə meydon vardedə.
De ım muğavilə dəbaste əlağədar mətbuatə konfransədə Azad Rəhimovi bə jurnaliston parsi cəvobədə votışe ki, ımsornə musabiğatədə azərbayçanıjə pilot iştirak nibəkarde. Ayəndə rallionədə çəmə ıştə milliə pilotiən iştirak nəzərədə qətəmone.
Əlavən ğeyd karde lozime ki, Az.R çe 2016-minə soriku bə “Formula-1” Qran Pri musabiğati umjən qıniə. Imsornə 4-minə jıqo tədbir apreli 28-30-minə rujonədə Bokuədə dəbəvarde. Kanə muğavilə tosə 2020-minə sori əhatə kardedəbe. Tojə muğavilə tosə 2023-minə sori dəbastə bıə.
Tərəfon çe muğavilə detalon, çanədə vəsaiti məsrəf karde barədə məlumat doəşon ni. Muxalifət votedə ki, muğavilə şərton niyo karde, jıqo ğeyri-şəffafəti hokuməti bədxarciəti və korrupsiya niyyətiku xəbə dodə.
Dinyo hətto ərbobə məmləkəton ım musabiğati boştə devlətə budcə bədxarciəti hisob kardedən. Məsələn, 2016-minə sori Almaniya, 2017-minə sori Yolə Britaniya de ım hənəki təşkilatkaron tojə muğavilə dəbasteku imtina kardəşonbe. Maliyyə məsrəfi vey bıe, və bə budcə mənfəət nıvarde bimi əsasə səbəb nişon doəşonbe.
