Səfir Cavad Cahangirzadə mətbuatə konfrans

Dəvardə rujonədə İroni Az.R-ədə səfir Cavad Cahanqirzadə Bokuədə mətbuatə konfrans dəvunişe. İm tədbir bə İroni İslamə İnğilabi 40-minə sorəqardışi həsr kardəşonbe.

Bə “Faktxəbər” sayti istinadən, səfir Cahanqirzadə votəşe ki, çəmə 2 qılə devləton arədə dustiəti, həmən iğtisadiə əlağon barzə səviyyədəy, ımən bə kali ğıvvon xoş omedəni, əvon çəmə məmləkəton arədə codayi eğande pidəşone. Əmo ım çəmə iğtisadi, turizm, dustiəti əlağon inkişafi vəy se zınedəni, ım rabiton sorbəsor barz bedən. Dəvardə sori iğtisadi əlağə 73% ziyod bıə, çəmə məğsəd ım sor de Az.R ticari devriyyə bə 5 milyard dollari rosnieye. Ey həmən ğeyd kardəşe ki, fevralə manqədə Xarici Koon vəziron Məhəmməd Cavad Zərif`i və Elmar Məmmədyarovi Tehronədə didor dəbəvarde. İm, çəmə məmləkəton arədə rabitə həniən ğoym bəkarde.

Pirallahiədə “Caspian Pharmed” Azərbaycan-İron muştərəkə dəvo istehsal kardə muəssisə inşa  barədə İroni səfiri votəşe ki, ım koy bə səhmon varde ro Az.R Səhiyyə, həmən İğtisadiyyati vəzarəton tərəfo lisenziya doe lozime. Nezə vaxtonədə ım şirkəti rəsmiyon bə Boku bomen, de ım vəzarəton həmkaron molağaton bəbarden.

Əlavən vote lozime ki, Pirallahi farmakoloqiya zavodi bino noə mərasim 2017-minə sori yanvarədə dəvuniə bıə.

İroni de Azərbaycani muştərək inşa kardə avtomobilə zavod de muvəffəğiyyəti inkişaf kardedə. Dəvardə sori Natəçolə “Xəzər” zavodədə 1 həzosən vey avto istehsal kardəşone, çey 95% realizasiya bıə. Həmonə maşinon 40% devlətə təşkilaton, 60% isə əhali tərəfo hıriə bıə. Imən zavodi istehsal kardə məhsuli muasir, həmən rəğabətin bıe nişon dodə. 2019-minə sori fevralə manqiku bı zavodədə “Pejo” markaninə avtomobili istehsali bino karde nəzərədə qətə bedə. İmən Natəçolə avtozavodədə koəkon miğdari 200 nəfəriku bə 300 nəfər bərosnie.