İ.Əliyevi minimum manqə məvcib ziyod kardışe

Prezident İlham Əliyevi məmləkətədə minimum manqə məvacibi 130 mənotiku bə 180 mənot ros karde barədə sərəncom doşe.

“Azadlıq.info” Əliyev hokuməti ım ğərori zəruri kardə səbəbon həxədə nıvıştedə ki, bə devləti doə rəsmiə məlumati əsasən, çe 2014-minə soriku məmləkətədə dəvom kardə 2 rəğəminə infilyasiya çe jimonə xarci məbləğ 50% vey kardəşe. Prezidenti ım qəmi şodoe dıminə səbəb bımədəy ki, bə dollari nisbətədə tosə ısət Respublikadə minimum məvaçib 76 dollari ğədərədə bıe ki, ımən postsovet məkani məmləkəton arədə orəxnə rəğəmonədə qıley bıe, bənə Az.R de karbohidraton və diqər təbiiə sərvəton qəncin bıə keşvər de Ğırğızıston və Tacikistoni i restədə ğəror qətedəbe. Peş Əliyevi ım sərəncomi minimum məvacib 106 dollar təşkil bəkarde, əmo ım məbləğən iqlə çe Pribaltika məmləkətonsə ne, çe Rusiya, Belorusiya, Ukrayna, Ğəzəxıston, Qurciston, Moldova və Ermənistonisən jinə səviyyədəy.

Bo jimoni ən zəruriə məhsulon ğıymətonən bə həmonə devləton nisbətədə hiçən erjon ni. Respublika Devlətə Statistika Komitə bə yanvarə manqi dair elan kardə məlumatədə ən vacibə məhsulon ğıiməton boho bıe məlum bedə. Bə ponə sori yanvarə manqi nisbətədə ərzağə məhsulon ğıymət de miyonə hisobi 1,7% boho bıə. Hətto çe dekabrə manqiku tosə yanvarə manqi ərzağon ğıyməti vey bıe muşahidə kardə bıə.

Jıqo bohoçiəti xidməti sahədən heste. Statistika Komitə ım sahədə ğıyməton bə dəvardə sori yanvari nisbətəən 3,4% boho bıe xəbə doəşe. İğtisadşunasə eksperton məmlkəti vıjoronədə ğıyməton daima boho bıe əsasə səbəbi iğtisadiyyati həmə sahon, xarici, hətto daxili ticarətiən monopoliston dastədə bıe, bı sahonədə salemə rəğabətə imkanon nıbeədə vindedən.