Taleh Bağırzadə bə ənəhardə aksiya orəx doəşe

“Mısılmonon İbemonə Hərəkati” sədr Taleh Bağırzadə fevrali 15-minə ruji bəştə ənəhardə aksiya orəx doe elan kardəşe. Həmonə ruji Dini Məhbuson Huğuğon Mudafiə Komitə həmsədron Eldəniz Ğuliyev və Revşən Əhmədov Ğobustani zindonxonədə de Taleh Bağırzadə, Nardarani faciə diqər məhbus Cabbar Cabbarov və Azərbaycani İslamə Partiya sədr Mevsum Səmədovi didor kardəşone.

Bı barədə Ğuliyevi bə Azadi Radio qəpədə məlumat doəşe ki, çəvon Komitə fevrali 11-ədə de Taleh Bağırzadə ənəhardə aksiya əlağədar bə Penitisiarə Xidməti muraciət kardəşbe. Manqi 15-ədə bəvon ənəxəbədə məlumat doşone ki, ım ruj Ğobustanədə bo çəvon didori imkan bəsoxten.

Eldəniz Ğuliyevi ıştə qəpi dəvomədə ğeyd kardəşe ki, de Taleh Bağırzadə vindemonədə həm ıştənon nomo, həm çey xoto piə çand həzo tərəfdaron, həmən “Milli Şura” nomo çeyku xahiş kardımone ki, bə ım aksiya orəx bıdo. İştənən ım aksiya bəştə məğsəd rəsə, Ğobustani zindonədə mevcud problemon ısət dınyo huğuğə mudafiəkaron diğğətədəy. Həni boştə jimoni xəto bə əməl varde ehtiyac mandəni. Xeyli xoş bıe ki, Hacı Talehən əməni bə sə dəşe, de çəmə votəy rozi bıe, elan kardışe ki, həni ıştə ənəhardeku dast kəşedə.

Penitensiarə Xidmət isə Taleh Bağırzadə ənəharde barədə xəbon təkzib kardedəbe de ım səbəbi ki, ey bə zindonxonə rəhbəriyyəti nə bey işqəncə doe, nəən ənəhardə aksiya bino karde barədə de ərizə muraciət kardəşni.

Fevralə manqi 12-ədə çe Hacı Tale pıə Kamil Bağırov və jimoni həmro Leyla İsmayılzadə dey zindonədə didor karde zınəşonbe. Taleh bəvon bəvədə  votəşbe ki, ısət 12 ruje ki, zindonədə bənə dəvon ğeyri-insonə rəftori etirazi ğida ğəbul kardedəni. Çey zəif və behol bekuən ım oşko vində bedəbe.

Respublika Mass-mediadə Huseyn Abbasoviən bə Taleh Bağırzadə ənəhardə aksiya umjən qınie xəbəon pevolo bıəbin. Əmo təəssuf ki, Dini Məhbuson Huğuğon Mudafiə Komitə həmsədron Huseyni barədə məlumat doəşon ni.