Az.R -ədə siyasiə məhbuson tojə siyahi

Az.R-ədə bə Siyasiə Məhbuson dair Koəkə Orup fevrali 20-ədə məmləkəti siyasiə məhbuson tojə siyahi elan kardışe. Im siyahiədə cəmi 181 nəfəri nom heste.

Əvonən bə 2 qrup co bedən. İminə qrup 127 nəfəro ibarəte ki, bə çəvon munasibətədə məhkəmə hokum bekardəşe, de Koəkə Qurpi tərtib kardə navkonə siyahi, dınyo huğuğə mudafiəkarə təşkilaton cəvon de siyasiə motivi məhkum bıe təsdiğ kardəşone. Dıminə ğism monitorinqə qrupe ki, əyo 54 kəsi nom heste. Bə çəvon munasibətədə məhkəmə, və ya istintağə proseson dəvom kardedə. Çəvon barədə hələ məhkəmə hokum bekardəş ni.

Koəkə Qrupi ğeyd kardəşe ki, de Qəncə hadison əlağədar 51 nəfər ki, dəstqir bıən, bə səbəb bə monitorinq qrup daxil kardə bıən ki, devlətə orğanon xeyli məğamonədə çəvon huğuğon darıştəşone. Məsələn, istintağə orğanon iddia kardedən ki, Qəncə hadison iğtişaş bıe, mutəşəkkilə cinayətkarə dastə tərəfo icra bıə, əmo bımi ro hiç qıley subut və ya videokəşemon bə miyon noe zınedənin. Çəvon məhkəmon nimojə şəraitədə dəvardedə, jurnaliston əyo iştirak xeyli məhdude. Çe Mass-media numayəndonku məhkəmədə iştirak karde ro akkreditasiya tələb kardedən, jıqo jurnaliston bə məhkəmə iclas vadoə bəpeştən əyo bəvon  jı –çi nıvışte, kəşe, ğeyd karde imkan dodənin. Çand kəs jurnalist çe məhkəmə zalo tojniəşone.

İminə qrupədə 67 nəfər dini, 18 nəfər ictimai-siyasi fəal, 14 kəs sosial məzmuninə etirazonədə iştirakəkə,  9 kəs jurnalist və bloqer, 8 kəs Səid Dadaşbəyli və çey qrupi odəmon, 4 nəfər siyasiə qirov, 2 nəfər devlətə məmur, 1-nəfər huğuğə mudafiəkar və 1 nəfər şair heste.

Koəkə Orupi ımşən məxsusi ğeyd kardə ki, keşvəri zindononədə siyasiə məhbuson miğdar çand  bəjəm veye, əmo xeyli jıqo məhbuson hestin ki, hokuməti onoə repressivə şərait çəvon barədə məlumat və subuton qırd karde imkan dodəni, ım məhbuson nezə əvlodonən çəvon barədə bə Qrupi məlumat doeku tarsedən.