Çe azərbaycanıjə zabiti DAİŞ-i canqonədə iştirak

Çe Az.R şəhrıvandon DAİŞ-i restədə iştirak karde barədə kafi ğədər fakton hestin. Çəvonədə xeyli ğism əyo de Suriya hokuməti hərbiə hisson canqədə tələf bin.

Əmandəyon bə vətən oqardəcəğin Az.R hokuməti muhafizə orğanon tərəfo dəstqir və bə dırozmuddətinə zindonə cəzo məhkum bedən. Çəvonədə qıleyən Respublika ərteşi sabiğ zabit Eldəniz Məmmədov bıe. Əv Naxçıvanski nominə hərbiə litseyi orıxniə bəpeşt 1996-minə sori bə Ali Hərbiə Dıyovonə məktəb ğəbul bıə. Tosə 2005-minə sori Respublika ərteşədə xidmət kardəşe. Bə çinayətə əməlon qorə 7 sor zindonədə nıştə bəpeşt 2012-minə sori azad bıə. 2013-minə sori çe Turkiyəku bə Suriya ərazi ovaştə və bə DAİŞ-i “Şuhəda” nomimə terrorə qoruhi umjən qıniə. De “Əbu Cihad” ləğəbi hərbiə əməliyyatonədə iştirakış bıə. Çəyo bə vətən oqərdə. 1 sori bədiqə bə Ukrayna dəro qıniə, de soxtə pasporti Kiyeviku bə Turkiyə, çəyoən sənibəton bə Suriya ovaştə. Cerablus, Rakka, Tapka şəhəron çe DAİŞ-i nəzarətədə beədə əyo muxtəlifə hərbiə əməliyyatonədə iştirak kardəşe. 1 sor jıqo canqonədə iştiraki bəpeşt 2016-minə sori bə Turkiyə Kilis şəhər ovaştə. Türkiyə muhafizə orğanon əv bə Boku deport kardəşone.

Eldəniz Məmmədovi məhkəmə ım sori yanvarə manqədə bə orəx rəsə. De  Boku Qonə Cinayəton Məhkəmə hukmi əvşon bə 15 sor 6 manq muddətinə zindonə cəzo məhkum kardə.