Boku hokumət dini fəalon bə cı səbəb təğib kardedə

Boku zindodonədə bə dini məhbuson işqəncə doe sosialə şəbəkon Azərbaycanə qruponədə daimi qıley mevzue. Imən hokuməti xeyli norohət kardedə. Əvon bə ım ğeyri-insonə əməli orəx doe əvəzi, ım əməlon de internet resurson vasitə cəmiyyəti arədə pevolo kardə odəmon daima bə hədəf sedən və təğib kardedən.

Həmonə fəalono qıley Bəxtiyar Bağırove. Fevrali 6-ədə polison əv Boku “Qənclik” metro stansiya neziku dızdiəşonbe. 6 ruji muddətədə ailə uzvonış çey barədə xəbə qəte zınəni. Nərimanov rayoni məhkəmə əv bə 15 sutkəninə zindonə cəzo məhkum kardışe ki, məvotbən, kuçədə bə bərkə vanqi dıjmon dodəybən.

İsət Bəxtiyar Bağırov çe zindono beşə. Bə Boku Apellyasiya məhkəmə şikayət kardəşe. Bı məhkəmədə ıştə dəstqiri əsl səbəb votəşe, “Azadlıq.info” saytiən bı barədə məğalə bəştə əhandon edaştəşe. Məlum bıə ki, “Bandotdeli” həmkaron tərəfo ey dızdie səbəb çey sosialə səbəkonədə Respublika zindononədə bə dini məhbuson doə işqəncon barədə videorolik pevolo kardeyebən. Ey həmən votəşe ki, 6 ruj əvşon “Bandotdel”ədə oqəte, və har ruj kuəşone ki, boçi ə videoçarx pevolo kardəşe. Vəkili məhkəməku xahiş kardəşe ki,  Bağorovi dəstqir kardə vırədə kameron hestin. Həmonə kameron kəşemononədə çey dıjmon doə kadron məhkəmə bə oşko bekardənine. Əmo hakimi vəkili ım vəsadət rədd kardəşe, Nərimanov rayoni məhkəmə hukm ğıvvədə oqətəşe.

Fevralə manqi 14-minə rujiən “Bandotdeli” diqər dini fəal Tural Allahverdiyev dızdiəşe, de 20 sutkə muddəti bə zindon dənoəşe. Çe “Operativ TV” doə xəbəku məlum bedə ki, Allahverdiyevi sosialə şəbəkonədə bo dini məhbusə ailəon ianə qırd kardə kompaniya təşkil kardəşebən. Yəğin ki, bı səbəbən əv bə zindon dəğandəşone.

Az.R polison bə dini fəalon və diniə məhbuson bı ğədər beəmonə munasibəti səbəbi Boku hokuməti rəsmiyon izah kardedənin, jıqo fakton daima bə həşə jedən.