İ.Əliyevi əhali bə bankon ğarzi barədə fərmon doşe

Prezident İlham Əliyevi əhali bə bankon ğarzi barədə fərman doşe. Məlume ki, mənoti 2015-minə sori fevrali 21-i tarixi devalvasiyaku bə nav, məmləkəti bankon bə əhali krediti de dollari dodəbin.

Həmonə sori dırozi mənoti bə dollari nisbətədə 78 korikiku tosə 1 mənot 70 kopiki erjon bıe şəhrıvandon həmonə kreditonən 217% ziyod bıe vardışe bekardışe. Bə vaxti çe əhali ım ziyani devləti tərəfo kompensasiya karde ro iğtisadşunason təşəbbus nişon doşone, əmo Konstitusiya Məhkəmə çe bankiron tərəf qətışe, qəror doşe ki, kreditoron bəpe ıştə ğarzi de tojə məzənnə oqırdınon. Imən bə ey səbəb bıe ki, bə bankon ğarzoxo bıə şəhrıvandon mutləğə əksəriyyət ıştə krediti oqırdınie imkanədə nıbe qorə bəştə ğəsd karde məcburiyyətədə mandedəbin.

İsət diən bıbo, prezident Əliyev bə bankon ğarzoxo bıə şəhrıvandon devləti tərəfo koməkəti karde barədə bə ğəror ome. Çey doə ım fərmanədə nəzərədə qətə bedə ki, əhali 2012-minə soriku tosə devalvasiya, yəni tosə 2015-minə sori fevrali 21-minə ruji de dollari peqətə krediton de həmonə vaxti mənoti bə dollari nisbəti kursi, yəni i dollari bə 78 kopiki bərobər sənibəton hisob kardə bəbe. Ə şəhrıvandon ki, de tojə kursi ziyodə pul bə bankon avjor kardəşone, ə məbləğ bə devləti vəsaiti hisob bəvon oqordıniə bəbe. Kom odəmi ıştə kredit tam oqırdınie imkanış bıə ni, bı səbəbən çey ğarzi səpe əlavə faiz omə, ım faizon ləğv bəben, əv ğarzi de kanə kursi obəqordınie.

İğtisadi təhlilqəron bə prezidenti ım fərmani tənğidiə munasibət nişon doşone. “Azadlıq.info” iğtisadşunas Revşən Ağayevi fikr bə əhandon edaştəşe. Ey votəşe ki, prezidenti ım ğəror anədə ğəliz nıvıştə bıə ki, nəinki sodə şəhrıvandon, hətto iğtisadşunasonən ey dərəseədə çətinəti kəşedən. Diqər iğtisadi ekspert Qubad İbadoğlu fikir jıqoe ki, ım fərman əsasən bə bankon maliyyə vəziyyəti musbət təsir nişon bədo, çəvon mışğılinə krediton ki, əhali bə banki oqırdınie imkanşon nıbe, bə devləti hisob bə bankon mədaxil bəbe. İmən əvoni behraninə vəziyyətiku bebəkarde.