Sabunçu rayoni məhkəmə Qəncə hadisə məhbusonədə 6 nəfər məhkum kardəşe.

Martə manqi 1-minə ruji Boku Sabunçu rayoni Qonə Cinayəton Məhkəmədə de Qəncə hadison əlağədar dəstqir bıə 6 nəfər məhbusi təhğiğat bə orəx rəsə. Elman Məmmədov, Elvin Nəzərov, Elvin Allahverdiyev, Nemət Heydərli, Renat Məmmədov və Vuqar Xudiyev bə 6 soriku tosə 8 sorinə zindonə cəzo məhkum bıən.

Fevrali orəxnə rujonədə de Qəncə hadison əlağədar dəstqir bıə 8 nəfəro ibarət i ğism məhbuson məhkəmən Qəncə şəhəri Qonə Cinayəton məhkəmədə bino bıe. Bə “Faktxəbər.com”i istinadən de ım hadisə əlağədar bə 80 nəfəri munasibətədə cinayətə ko bino bıə. Çəvonədə bo çand nəfəri axtarış elan kardəşone.

Qəncə hadison əsasə iştirakəkə Yunis Səfərovi istintağ isə hələən bə orəx rəsəni. Boku hokumət çey vəziyyəti barədə bə cəmiyyəti xəbə rosnie vəy sedə. Bı rujonədə Vəkilon Kolleqiya bə Səfərovi vəkili- Elçin Sadığovi tehmət elan kardəşe. Çimi səbəbən əv bıə ki, Yunisi moə Leylaxanım İsmayılova vəkili de Yunisi vindemonon prokuratura tərəfo niyokıle quş doe, həmən bə vəkili təhdid və təzyiğon barədə bə cəmiyyəti məlumat doəşbe. Respublika Sər Prokuratura vəkil Elçin Sadığovi tanbeh karde barədə bə Vəkilon Kolleqiya məktub vığandəşe. Kolleqiya Rəyasət heyətiən prokuratura tərəfo ğanuni darıştə fakton bə nəzər sə nişe və çey sifariş bə vırə rosniəşe. Im xəbə “İslamazəri” sayti bə “Turan” İnformasiya Aqentiyyəti istinadən pevolo kardəşe.

Dəvardə rujonədə Boku şəhəri Kurdəxonə istintağə təcridxonədə Qəncə şəhəri sakin Şirvan Musayev və Penitensiar Xidməti 3 numrəninə istintağə təcridxonədə Boku şəhəri sakin Namiq Xudaverdiyevi  ğəflətən vəfot kardəşone. Penitensiar Xidməti rəsmiyon çəvon marde səbəbi barədə məlumat doəşon ni.