Biləsuvar rayonədə polisi de əhali arədə münağişə bıə

Dekabri 22- minə ruji Biləsuvar rayoni pənahəndəon de polisi arədə münağişə bıə. Əvon bə çəvon 11 qılə ğəsəbə bərği bırie etiraz kardəşone və İmişli- Biləsuvar maqistral şosse ro pebıriəşone. Nəticədə de polisi dave eqınə. "Azadlıq.info" nıvıştedə ki, polisi 35 nəfər dəstqir kardəşe. Respublika Prokurotura və DKV-i bahəm rəsmi məlumatədə votə bedə ki, polis nəfəronədə 9 kəsi xəsarət səşe. Əmo aksiya iştirakəkon bə "Azadlıq radiosu" votəşone ki, xəsarət sə polision miğdar 1 nəfəre.

Dekabri 24 -ədə "Azəriişıq" cəmiyyəti müavinon, Cəbrayıl icra hakimiyyəti sərdar və həmonə ğəsəbon Milli Məclisi deputat Aslan Şahverdiyev  de pənahəndəon vindemon kardəşone. Milləti vəkili bə həmonə radio müxbiri votəşe ki, i qrup nəşəxorə və sərxoşə odəm cəhd kardəşone ki, camaati bə hokuməti əleyh ros bıko. Əvon ıştə cəzon bəsen.

Həmonə ruji Xırdalan şəhəri, Həzi Aslanov kuçə 2 nurəninə bina 200 nəfər sakinonən etiraz aksiya dəvuniəşone. Səbəb bə çəvon bina bərği ğət karde bıə.

Ğərəbağ veteranonədə i qrup odəmən etiraz aksiya dəvunie hozo bedən. Bı barədə "Modern.az" sayti xəbə doəşe. "Azərbaycan Vətən Müharibə Veteranon ibemon"i mətbuat xidməti rəhbər Xaqani Rzağuliyavi votəşe ki, 18 nəfər müharibə əlil çe Əhali Sosial Müdafiə Vəzarətiku ıştə  34 həzo mənot məbləğədə məvacibi 1 sore ki, se zınedənin. Bə qorə ğərarşon heste ki, etiraz aksiya dəvunon.

Devləti rəsmiyon bəs  ım aksiyon səbəbkaron de kom nom-ləkə təhğir bəkarden? Çok əbi ki, əvon  xalqi jıqo etirazonədə ıştə nağisə siyasəti nəticə bıvindon, və ım nağisəti çe arə barde ro səy nişon bıdon.