Bə Gəncə hadisə məhbuson munasibətədə ğeyri-ğanuniə hərəkəton

Siyasiə Məhbuson Huğuğon Mudafiə Mərkəzi uzv, huğuğə mudafiəkar Okqay Qulalıyev Qəncə hadisə məhbuson vəziyyəti omute ro bə Qəncə şə, əyo de çəvon ailə uzvon vindemon kardəşe.

Ey bi barədə bə “Azadlıq.info” qəp jəşe, votəşe ki, bə ım valideynon qəpon ki, bə çəvon fərzəndon jıqo beəmonə işqəncon doəşone, quş doeədə odəm bə dəhşət omedə. İ kərən oşko bedə ki, hokuməti məmləkətədə insonə huğuğon təmon dəfn kardəşe.

Valideynon bə Quləliyevi votəyono məlum bedə ki, çe muttəhimon mudafiə huğuğ təmin bıə ni, bə mustəğilə vəkilon əvoni mudafiə karde imkan doəşon ni. Tosə ısət bəvon nə ittihamə akt, nəən məhkəmə hokum doə bıə ni. Məhbuson hətto de kom maddon ittiham bıeən zınedənin. Dəstqir bıəkəson ailəon anədə kosib və beçizin ki, ıştə fərzəndon məhkəmədə iştirak kardero bə Boku şe  maddi imkanşon  ni.

Bə “İslamazeri” sayti əsasən, Qəncə hadisə məhbuson 8 nəfəro ibarət 2-minə qrupi məhkəmə bə orəx rəsə. Sabunçi rayoni Qonə Cinayəton Məhkəmə Cabir Əzizov, Qulmerzə Nuruzadə, Riya Nuruzadə, Fikrət Mirzəliyev, Eyruz Hacıyev, Səbuhi Rəcəbov, Elman Quliyev və Sabir Əzizov bə 5 soriku tosə 8 sorinə zindonə cəzo məhkum kardəşe.

Bə Sər Prokuratura doə məlumati əsasən de Qəncə hasison əlağədar 6 qrup ki, səpeyəndı 51 nəfəro ibarəte, çəvon istintağ orəxə, koonşon bə məhkəmə vığandə. Umumən isə Qəncədə vağeə bıə 3 iyul hadisə  ki, Yunis Səfərovi şəhəri icra sərdar Vəliyev de qolulə jəşbe, dey əlağədar bə 29 nəfəri əleyh cinayətə ko bino bıə, cəvonədə 11 nəfər bə axtarış doəşone. Dıminə hadisə ki, iyuli 10-minə ruji bə 2 nəfər polisə zabiti ğətli səbəb bıe, dey əlağədar 59 nəfər dəstqir bıə, 1 nəfər axtarışədəy. Bə 1 nəfəriən sosialə şəbəkonədə bə ım hadison dair şərh nıvışte qorə 2 sor zindonə cəzo bıriəşone. Polison tərəfo kıştə dini fəalonən bə hisob bısəmon, hokuməti tərəfo ım hadison qınokar zınəkəson miğdar 100 nəfərisən veye.