İİR de Az.R iğtisadi əlağon inkişafədə tojə mərhələ

Martə manqi 6-ədə İİR Prezident Həsən Ruhani “Şimal-Cənub” Beynəlxalğə Osonəro Dəhlizi əsasə hissə - Ğəzvin-Rəşt-Hostoro osonəroy Ğəzvin-Rəşt ğismi obemonə mərasimədə işrirak kardəşe.

“Faktxəbər” bə AzərTac-i əsasən xəbə dodə ki, bı mərasimədə de Rusiya, Hindistan, Miyonə Asiya məmləkəton bahəm Az.R numayəndonən iştirakşon bıə. Prezident Ruhani ım layihə bə jimon dəvuniedə İlham Əliyevi xidmət məxcusi ğeyd kardəşe, votəşe ki, ım ro çəmə xalqon inkişafi bahəm bə nav bəbarde. Peşo İroni ro və səhərinşa vəzir Məhəmməd İslami ıştə nitğədə votəşe ki, ım Beynəlxalğə layihə Avropa – Asiya, həmən  Xəlice Fars, Siyo dıyo və Şimali Avropa keşvəron nəğliyyatə rabitə inkişaf karde roədə yolə əhəmiyyətış heste.

Bı mərasimədə Az.R iğtisadiyyati vəzir Şahin Mustafayeviən nitğ ehandəşe, votəşe ki,  Az.R de İroni arədə munasibəton bə barzə strateji muttəfiğə səviyyə rəsə. Dəvardə sori di qılə devləton arədə ticari devriyyə 74% ziyod bıə.  Ey həmən İroni xalğ  navo omə de Nəvuzə idi munasibəti təbrik kardəşe.  

“İslamazeri.com” saytən bə İroni media əsasən İroni enerqetika vəzir Reza Ərdəkanian`i qəpon bə əhandon nəzə rosniəşe. Reza Ərdəkanian`i Tehronədə de Şahin Mustafayevi didorədə votəşe ki, İroni elektrikə şəbəkə de Az.R vasitə bə Rusiya elektrikə şəbəkə anqıl bəkarden. Haliyədə İroni de Az.R arədə enerji mubadilə karde həxədə muğavilə bərğərore, ım sahədə bo həmkarədi karde ro çokə potensialon hestin.