Respublika vıjoronədə ğıyməton boho bıe səbəb çiçe

Prezident İlham Əliyevi əhali pensiya, sosialə muavinəton, minimum manqə məvacibi ziyod karde həxədə sərəncom doə bə peş Respublika vıjoronədə ğıyməton həmonə ləhzə boho karde bino bıe.

Imən iğtisadşunasə eksperton nəzəriku bə kəno nımande. Revşən Ağayevi bə Meydan TV votəşe ki, salemə rəğabətinə normalə İğtisadiyyatədə əhali pul mədaxili 3-5% ziyod bıe hiç curə bə ğıyməton boho bıe təsir nişon doe zınedəni. Az.R iğtisadiyyatədə salemə rəğabəti nıbe, daxili və xarici ticarəti çe monopoliston inhisarədə bıe bə ğıyməton ım cur boho bıe səbəb bedə. Orəxnə həftədə 5 kiloynə olətşıştə poroşoki ğıymət çe 16 mənot 50 kopikiku bə 18 mənot 50 kopik, 89 kopikinə sobuni ğıymət bə 92 kopik, 1 kisə 50 kiloynə ordə ğıymət 26 mənotiku bə 29 mənot ros bıə. Təməkuə məmulaton ğıymətonən boho bıən.

İğtisadi təhlilqər Nemət Əliyeviən ğeyd kardəşe ki, marketonədə 1 kilo xomətu ğıymət 3 mənot 20 kopikiku bə 4 mənot 10 kopik ros bıə ki, ımən 28% -sə veye. Hokuməti rəsmən elan kardəşe ki, yanvarə manqədə infilyasiya 1,7% bıə. Bə prezidenti sərəncami əsasən pensiya de miyonə hisobi 3% ziyod kardəşone. Fevralə manqi infilyasian bə nəzər bısənəmon, hokuməti bo əhali nəzərədə qətə həmonə ziyod bıə məbləğ vəbəziyod bə monopoliston cif ru bəbe.

Diqər ekspert Vuğar Bayramov votedə ki, Respublika vıjoronədə ğıyməton boho bıe çəş kardə bedəbe. Çinki Parlamenti bə Verği Məcəllə kardə əvəzon, bə xeyli idxali məhsulon aksizə verqion ziyod karde mutləğ daxili ticarətədə bə ğıyməton boho bıe səbəb bənin bıe, ki ım jıqoən bıe. Im, hokuməti bardə məğsədinə siyasəti qıley nəticəy.