Az.R -ədə ovi ehtiyat bə kam bıə

Az.R Ekoloqiya və Təbii Sərvəton Vəzarəti Milliə Hidro Meteoroloqiya Departamenti direktor Umayra Tağıyeva bə jurnaliston votəşe ki, məmləkəti Yolə bə Rukə Ğəfğazi ərazionədə Departamenti mutəxəssison va təbəğə həcmi muəyyən kardə monitorinq dəvunidən. De ım roy məmləkəti ruonədə ovi potensiali muəyyən kardedən.

Məlum bıə ki, məmləkətədə orəxnə soronədə va-voşi kam, tempraturi barz bıe bey səbəb bıə ki, keşvəri ovi ehtiyat 10-15% saru eqıniə. Bə səbəbən ovə mənbonku de ğənaəti istifadə karde zərurət bə meydon beşə.

Jıqo vəziyyətədə Respublika məntəğonədə, məxsusən dionədə əhali de peşomə ovi təchizatədə problemon hələən həll bıə nin. Meydan TV çe Ağdaş şəhrestoni Ğərədağlı di əhali ovi problemi həxədə nıvıştəşe. Diy sakin Tamara Mehdiyeva votəşe ki, 1 manqədə bə ovi tosə 100 mənoti pul xarc kardedən. Nezə artezianə çol çe diku 3-4 kilometr diəroe. Çəyo ov varde ro bə maşini har ruj 3 mənot pul dodə.

Reyhan Məmmədova ğeyd kardəşe ki, diədə ovə cu heste, əmo çey ov anədə lırdine ki, çəvədə bo hiç çi istifadə karde mumkun ni. Səadət Qurbanova bə Ağdaş rayoni İcra sərdari çand bəjəm şikat karde barədə qəp jəşe ki, çe diku tosə rayoni mərkəzi məsafə cəmi 1 kilometre. Əmo çəmə ovi problemi həll karde ro ovə lulə okırneku imtina kardedən. Hiç nıbo diy ıştənədə qıley artezian bıkandon ki, bə çəmə kəşə zilləti orəx doə bıbo.

Ağdaş rayoni İcra Hakimiyyəti rəsmi numayəndə bə Meydan TV parsi cəvobədə votəşe ki, Ğərədağli diədə ovi problem ni. Diədə ovə cu və artezianə col heste. Həmonə diədə roy problem mevcude, əv çəmə diğğətədəy, nezə vaxtonədə eyən həll bəkardemon.