Boku hokuməti Ğum universiteti tələbə Ruhullah Novruzzadə bə vətən vanıdoşe

Ruhullah Novruzzadə Ğum Universiteti Huğuğə fakultədə təhsil sedə. Çey pıə Mənsim Novruzov noxəşe, vəziyyətış qone. Deştə zoə orəxnə vindemon karde, bey iştə vəsiyyəti rosnie piəşe. Bı səbəbən martə manqi 13-minə ruji Ruhullah de həvopeyma çe İrono bə Boku ome. Maştə subhədəli həvopeyma bə Boku aeroport enışte. Əmo Ruhullaşon əyo oqəte, bəştə kə vanıdoşone.

Ruhulla Novruzzadə çe Hacı Abgul Suleymanovi ğeyne. Hacı Abguli jimoni həmro Zəhra Suleymanova həmonə ruji bə Respublika Sər Prokuratura zanq kardəşe. Əyo bey votəşone ki, bəştə rayoni, yəni bə Suraxanı prokuratura muraciət bıko. Zəhra xanımi bı barədə bə “İslamazəri.com” sayti məlumat doəşe. Suraxanı rayoni prokuraturadə məlum bıə ki, çe  Sər Prokuratura bə Qonə Cinayəton aid İdarə de Nardarani hadisə əlağədar Ruhulla  bə vətən oqarde ğədəğən kardəşe.

Həmonə ruji şanqo saat 12 nimədə aeroporti marzvonon əv bə Boku – Tehron reysi həvopeyma nışandəşone. Bı barədə Novruzzadə bəştə əvlodon xəbə doəşe. Votəşe ki, əvşon xariciə şəhrıvandon deport kardə neytralə zonadə oqətəşonbe. Həni omə bə Ğumi rəsə. Bo çey tale ro norohəti dəvuniə odəmon ıştə təşəkkur rosniəşe. Ğeyd kardəşe ki, nezə vaxtədə bı barədə ətrofinə məlumat pevolo bəkarde.

Ruhulla 4 sor bə nav, yəni 2015-minə soriən bə vətən oqarde cəhd kardəşbe. Bə vaxtiən əvşon marziku bə vətən daxil bıe haştə nıbe, bə İron oqordıniəşonbe.

Im fakti Az.R hokuməti bəştə şəhrıvandon dini mənsubiyyəti çı curə tolerantə munasibət nişon doe i kərən bə oşko bekardışe.