Az.R huğuğə mudafiəkaron Ruhullah Novruzzadə bə vətən vanıdoe məhkum kardışone

Dini fəal Ruhullah Novruzzadə ki, İroni Ğum Universiteti tələbəy, marti 13-minə ruji bə vətən omeədə Boku aeroportiku oqordıniəşonbe. “İslamazəri.com” sayti de ım hadisə əlağədar bə Respublika huğuğə mudafiəkaron muraciət kardəşe.

Çəvonədə Namizəd Səfərovi votəşe ki, ısət məmləkətədə ıştənbəsəti həni həddı-hudud nişe. Devləti vəzifədaron bəştə ğeyri-ğanuniə əməlon ro hiç qıley məsuliyyət hiss kardedənin. Tosə ısət hiç qıley məmur şəhrıvandon huğuğon darışte, bəvon maddi ziyan je səbəbiku bə məsuliyyət cəlb bıə ni. Ruhullah Novruzzadə Az.R şəhrıvande, dıminə keşvəri şəhrıvandiəti nişe. Ey bə vətən nahaşteyən mislış nıbə qıley ğeyri-ğanuniə əməle. Im, məmləkətədə hokuməti odəmon bəştə siyasiə nəzəron qorə təğib karde nişon doə fakte.

Dini Məhbuson Mudafiə Komitə sədr Eldəniz Ğuilyevi hokuməti ım hərəkət beaburinə və beəxlağinə əməl hisob kardəşe. Votəşe ki, hokumət deştə ım hərəkəti həni əndazəku ovaştə. De Ruhullah Axundzadə zoən jıqo rəftor kardışone. Isət dədə-balə əvon deyninən zindonədə məhbusin. Nomşon siyasiə məhbuson siyahiədəy. Ğeyd karde lozime ki, çe AİP navğədəmono qıley Ruhullah Axundzadə 2011-minə sori bə 11 sor 6 manq muddətinə zindonə cəzo məhkum kardışone. 2015-minə sori bo çey zoə Məhəmmədiən 5 sor 6 manqinə həbs cəzo bırişone.

“Besiyasiə Məhbusinə Azərbaycan” təşkilati sədr Elşən Həsənovi ğeyd kardəşe ki, hokuməti jiqo hərəkəton iminə kərə ni. Ruhullah Novruzzadə bə vətən nahaşte təmom ğeyri-ğanuniə əməle bıe səbəbiku bə çey deportasiya aid bey hiç qıley sənəd doəşon ni ki, əv bə hiç vırə şikat karde nızıno. Dəvardə sori Şamxal Eyvazovən ki, əvən Ğum şəhərədə təhsil sedəbe, iminə kərə bə vətən vanıdoşone, dıminə kərə omeədə de narkotikə ticarəti bey şər ğandışone, dənoşone bə zindon. Isət çey nomən siyasiə məhbuson siyahiədəy. Həsənovi ımən əlavə kardəşe ki, Novruzzadə deport karde tamamən beğanuniə hərəkəte. Im fakti bə ictimaiyyəti nəzə rosnie, həmən bə məhkəmə muraciət karde vacibe.