Prezident İlham Əliyevi 431 nəfər məhkum əvf kardışe

De Nəvuzə İdi munasibəti prezident İlham Əliyevi 431 nəfər məhkum əfv kardışe. Çəvonədə 399 nəfər ıştə əmandəynə zindonə cəzo kəşeku, 12 nəfər cərimə cəzoku, 11 nəfər şərti çəzoku, 3 nəfər islahə koonku, 1nəfər ictimaiə koon icraku azad bıən. 3 nəfəri umrinə zindonə çəzo de 20-25 sornə zindonə cəzo əvəz kardəşone.

Im sərəncomi əsasə cəhət əve ki, Əliyevi əvf kardə odəmon arədə  50 nəfər siyasiə məhbusən heste. Çəvonədə 9 nəfər Nardarani hadisə, 10 nəfər Siyəzəni etarazə aksiya, 3 nəfər Minqəçevir etirazə aksiya, 6 nəfər dini fəal, 5 nəfər Səid Dadaşbəyli qrupi, 4 nəfər AXCP, 4 nəfər NİDA hərəkati uzv, 2 nəfər jurnaliste.

Məşhurə dini və siyasiə xadimon- hafiz-ul Ğuran Hacı Zulfiğar Mikayılzadə, seyid Elman Ağayev, AXCP sədri muavinon Qezəl Bayramlı və Fuad Ğəhrəmanlı, “heykəli məhbuson” Ğiyas İbrahimov və Bayram Məmmədov, sabiğ mustəntiğ Rufət Səfərov, sabiğ səhiyyə vəzir Əli İnsanov, şair Tofiğ Həsənliən həmonə əvf bıə odəmon arədən.

“Azadlıq.info” AXCP sədr Əli Kərimli bə ım sərəncami munasibət bə əhandon nəzə rosniəşe. Kərimli bə Prezidenti ım hərəkəti musbətə ğıymət doəşe, votəşe ki, “əmə şo bedəmon ki, 50 nəfər siyasiə məhbuson, çəvonədə 4 nəfər çəmə partiya həmməsləkonən bə azadi beşən. Əmo ım kafi ni. Həm beynəlxalğə ictimaiyyət, həm Azərbaycani xalğ tələb kardedəbe ki, məmləkətədə siyasiə məhbusə problem dırıst həll bənine. Çunki ım odəmon hiç qıley qıno soyb nin, nohəx, de şər və bıhtonə maddon məhkum bıən. Heyif ki, İlham Əliyevi ım fırsət tosə orəx bə vırə nırosnişe. Məmləkəti zindononədə 100 nəfərisən vey siyasiə məhbus mandə. İm problemi dırıst həll karde ro əmə ıştə mubarizə dəvom bəkardemon.

Co siyasiə təhlilqəronən fikir jıqoe ki, ım sərəncom bə hokuməti irtica siyasəti zəif bıe dəlalət kardedəni. Rejimi bə azadfikrə odəmon munasibət bənə navonə vaxton xeyli saxte.