Az.R təhlilqəron İlham Əliyevi əfv sərəncomi barədə nəzəron

Prezident İlham Əliyevi i ğism məhkumon əfv karde barədə doə 16 mart tarixinə sərəncom ıcət çe Respublika cəmiyyəti diğğəti mərkəzədəy. Meydan TV bə ım sərəncomi kali siyasi təhlilqəron fikir bə əhandon rosniəşe.

“Turan” İA direktor Mehman Əliyevi votəşe ki, umumən orəxnə vaxtonədə məmləkətədə şə proseson hokuməti bə liberalə siyasəti rəvoc doe niyyətiku xəbə dodə. Xarici təzyiğon, həmən daxilədə vəziyyəti şe-şe qıvonin bıe ey bə liberal islahaton barde məcbur kardedə, bı səbəbən qımon veye ki, jıqo proses dəvom bəkarde. Imən bə mevcud avtoritar sistemi demontaji səbəb bəbe.

REAL partiya uzv Erkin Ğədirli de ım fikri rozi ni, jıqo hisob kardedə ki, ım, hokuməti sərt daxili siyasəti kamişi nam kardeye, de liberalizmi hiç qıley əlağə nişe.

Siyasiə təhlilqər Hikmət Hacızadə çe Ğədirli ım fikir təsdiğ karəşe, votəşe ki, liberaləti devləti məhkəməon mustəğiləti, azad Mass-media, sıxanə azadi təmin karde nəzərədə qətedə ki, hokumət hələ ım roədə islahaton bino karde fikirədə ni.

Məmləkətədə məmuron orəxnə rujonədə rəvoc doə əməlon çe Hacızadə ım fikri təsdığ kardedə. Dini fəal Ruhullah Novruzzadə, İroni Ğum Universiteti tələbə, Az.R şəhrıvandi marti 13-minə ruji bə vətən omeədə tamamən ğeyri-ğanuni Boku aeroportiku bə İron deport karde, martə manqi 15-ədə AXCP uzv Aqil Hummətovi bekorəti səbəbiku ıştə xeyzoni qonə sosialə vəziyyəti barədə bə Prezident Əliyevi de video muraciət karde səbəbiku polison tərəfo dəstqir bıe, martə manqi 10-ədə şəhid Novruzəli Məmmədovi ğəbi ziyarət kardə tolışə fəalon Hostoro polisi tərəfo bə təhğiğat cəlb bıe, marti 18-ədə bə jurnalist Anar Məmmədovi ki, çe Qəncə icra hakimiyyəti sərdar Elmar Vəliyevi de qolulə je həxədə məğalə nıvıştəşbe, bə 5 sor 6 manqinə şərtinə zindonə cəzo məhkum karde və bənə bımon həniən co təbəddulaton nişon dodə ki, Boku hokuməti məmuron ıştə kanə vərdışonku dast kəşe fikirədə nin.