Az.R-də çe İroni 1 həzo qılə muəssisə fəaliyyətış heste

İroni de Az.R arədə iğtisadi, ticari və humanitar sahədə həmkarəti əlağon sorbəsor zumand bedə, inkişaf kardedə. Marti 14 və 15-minə rujonədə Bokuədə ım devləton arədə iğtisadi biznes-forum dəvarde.

İğtisadiyyati vəzir Şahin Mustafayevi bə ım forumi həsr bıə mətbuatə konfransədə votışe ki, orəxnə 5 sorədə çəmə məmləkəton arədə əlağon xeyli inkişaf kardəşe, bə muxtəlif sahəon dair tosə 50 qılə sənəd ğəbul kardəmone. İroni 1 həzosən vey şirkət çəməku çe devlətə ğeydiyyato dəvardə. İroni bə Az.R iğtisadiyyati noə sərmoyə bə 3 milyard 400 milyon dollari rəsə. “Xudafərin”, “Qız Qalası”, “Ordubad və Marazad” Ovə Elektrikə Stansiyon inşa karde ro Muştərəkə komissiyon təşkil kardəbə. 330 km dırozi İmişli-Parsabad elektrikə xətt bə istifadə doəbə. Prespektivədə İron-Azərbaycan-Rusiya və İron-Azərbaycan-Qurciston vahidə elektrikə sistemi, Azərbaycan-İron-Turkiyə elektrikə koridori onoe nəzərədə qətə bedə. Di təsərrufat, səhiyyə, təhsil, turizm sahonədə əlağon mutəmadi inkişafədəy.

SOKAR-i de İroni NİCO şirkəti arədə həmkarəti sayədə Naxçıvani de ğazi təchizat təmin kardə bəbe. İroni “Etihad” həmən “Qartal” şirkəton de “Azərmaş” Ojə Səhmdarə Cəmiyyəti arədə Naftəçolə sənaye Məhəllədə avtomobilə ehtiyatə hisson, Hacığabul Sənaye Məhəllədə avtobus istehsali barədə ğəror ğəbul kardə bıə.

Forumi orəxədə dı qılə devləton arədə yekun protokol ğəbul kardəşone. İm sənəd Az.R tərəfo iğtisadiyyati vəzir Şahin Mustafayevi, İİR tərəfo İğtisadi Koon və Maliyyə vəzir Fərhad Dejpəsənd`i imza kardəşone.