De Qəncə hadison əlağədar 8 nəfəriən məhkəmə bino bıə

Boku Sabunçi rayoni Qonə Cinayəton Məhkəmədə de Qəncə hadison əlağədar dəstqir bıə diqər 8 nəfər məhbusonən muhakimə bino bıə. Bı məhkəmə iclasədə huğuğə mudafiəkar Oqtay Quləliyevi iştirak karde zınəşe. Ey ım prosesi barədə ıştə fikron de “Azadlıq.info” sayti vasitə bə cəmiyyəti edaştəşe.

Çey votəyonku məlum bedə ki, məhbuson məhkəmə salonədə bənə xətomandə ğatilon zəncirbədast oqətəşonbe. Vəkilonən devləti tərəfo təyin bıe səbəbiku bə prosesi anəhoyən mudaxilə kardedənıbin. Hətto hakim çe muttəhimiku tələb kardeədə ki, ıştə taxsi bə qiy bıqəto, bə həmonə muttəhimi təhkim bıə vəkil bə hakimi jıqo ğərəzkorəti etiraz kardedənıbe.

Məhkəmə iminə rujiku məlum bıe ki, bə məhbuson xeyli ğeyri insonə işqəncon  doəşone ki, əvon ıştəni muğəssir bızınon, bə çəvon əleyh ittihami təsdiğ bıkon. İşqəncon anədə dəhşətin bıən ki, kali məhbuson, çəvon ailə uzvon məhkəmədə iştirakşon bıe səbəbiku ım fakton bə zıvon varde pidəşon nibe ki, çəvon valideynon mənəvi əzob nıkəşon. De ım sıftənə ruji prosesi ittihami canədə soxtə bıe və arədə bə ım dəstqir bıə odəmon əleyh votə ittihamon tam beəsas bə besubut bıe bə oşko beşe.

Oqtay Quləliyevi ıştə navonə nıvıştəyonədə ğeyd kardəşbe ki, “ Bandotdel”ədə məxsusiə işqəncə labarotoriya hestebən. Bı məhkəmə prosesi qardışədə ın fakt i kərən təsdiğ bıe.

“Mısılmonon İbemonə Hərəkati” uzv, de Taleh Bağırzadə ailəvi dust Anar Cabbarovi Turkiyə polisi tərəfo dəstqir bıe və  bə Az.R polisi təhvil doə xəbə pevolo bıeku 10 ruj vaxt dəvardə, əmo tosə ışət Azərbaycanə Respublika  huğuğə muhafizə orqanon tərəfo çey tale barədə hiç qıley məlumat doəşon ni. Anari moə Hokumə Cabbarova votedə ki, bo çey mudafiə ro vəkil qətəşone, bə Daxili Koon Vəzarəti, bə “Bandotdeli” çanədə muraciət kardəşone, əmo hic vırədə çe Anari tale barədə məlumat bə dast varde mumkun bıəni. Cey ailə de 3 qılə korpə əğıli Turkiyədə besəy-bepo mandə, ıştə pasivani bə çəşin.