Huğuğə mudafiəkaron “ Gəncə məhbuson” tale diğğəti mərkəzədə oğətedən.

“Musavat”i Boku ğərarqahədə Siyasiə Məhbuson Mudafiə Mərkəzi fəalon bə “Qəncə hadison” dair məsemon təşkil kardəşone. Bə tədbirədə əsasən de ın hadison əlağədar dəstqir bıə məhbuson nezə odəmon qəp jəşone, bə çəvon fərzəndon çanədə beəmonə işqəncon doe barədə bə huğuğə mudafikaron ətrofinə məlumat doəşone.

Huğuğə mudafiəkaron ıştə votemononədə ğeyd kardəşone ki, devlət çe “Qəncə koy” istintaği sənibəton bardənine. Im iğtişaşonədə 7-8 kəsi çinayət kardəşebu, de ım vonə 77 nəfəri bə çinayətə məsuliyyət çəlb karde səbəb çiçebu?

Çe Mudafiə Mərkəzi sərdar Oqtay Quləliyevi ım məsemoni təşkil karde məğsədi barədə votəşe ki, çəmə məğsəd istintaği vaxti bə məhbuson doə işqəncon, məhkəmə proseson tam beədalətin barde bə cəmiyyəti nəzə rosnieye . Ey həmən ğeyd kardəşe ki, ım məhkəmə proseson həxədə bə huğuğə mudafiəkaron votə tənğidon hələ ki, devləti huğuğə muhafizə orqanonku cəvob se mumkun bıə ni.

Martə manqi 30-ədə ım məhbuson nezə odəmon çe Prezidenti adminstrasiya bina vədə aksiya dəvuniəşone, jığo behuğuğəti və beədləti bə devləti rəhbəron nəzə rosnie piəşone, votəşone ki, “kıştə bıə kəson məlum, kıştə kəsonən məlume, əmo çəmə hırdənon bə zindon dəğandəşone”.

Əlavən vote lozime ki , tosə ısət 51 nəfəro ibarət 6 qılə qrupi cinayətə ko bə məhkəmə vığandə bıə. Çəvonədə 2 qılə qrupi  məhkəmə bə orəx rəsə. Bə iminə qrupi 6 nəfəri 6 soriku tosə 8 sori, dıminə qrupi 8 nəfəri 5 soriku tosə 8 sori zindonə cəzo bıriəşone.

Bə yod buəmon ki, Qəncə hadison ponə sori Yunis Səfərovi Qəncə şəhəri İçra hakimiyyəti sərdari de qolulə jeku bino bıe. Səfərov həmonə ruji dəstqir kardışone. Əmo tosə ısət çey istintağ bə orəx rəsə ni. Im istintaği qardışi barədə əlağədar orğanon bə cəmiyyəti hiç qıley məlumat dodənin.