Polisə rəisi ıştənbəsə əməlon.

Ağdaş şəhrestani Yuxarı Zeynəddin diədə Kəlbəcəriku didərqin eqıniə çand qılə xeyzon jimon kardedə. Əvon boştə heyvodarə fermerə təsərrufat onoəşone.

Həmonə təsərrufati səvon Yadiqar Həsənovi ıştə problemon həxədə bo Meydan TV qəp jəşe. Votəşe ki, “cand sorone ki, ım təsərrufat təşkil kardəmone. 10 qılə xeyzon iyo ko kardedə, ıştə ailə quzərani təmin kardedə. Tosə ısət de devləti orğanon hiç problemmon bıə ni. Çoko ki, bə Ağdaş rayoni rolisə idarə Rasim Mustafayev nominə tojə rəis təyin kardışone, çəmə siyo rujon bino be. Məsələ bımədəy ki, əv bə vəzifə oməcığin əmənış vanq karde, votışe ki, bəpe bey har manq 1 həzo mənot pul bıdəmon. Əmə rozi nıbimon, çə rujonkuən bo əmə mışğılon bə meydon beşin. Cımı jimoni həmroşon vıjorədə kue, bə polisi şikat kardımone, bə çəmə şikati diə nıkardışone, 2 kərə çəmə ferma molonədə dızdişone, polison bımi məhəl nınoşone, de çəmə mivə boği miyoni kanal kandışone, 250 qılə mivə do anceşone, bə polisi şikat kardımone, əvon omin bə çımı 2 qılə zoə əleyh cinayətə ko bino kardışone ki, quya əvon bə devləti koy icra kardəkəson de təvə hucum kəşəşone.

Bə Respublika Prezidenti, Vitse-Prezidenti, Sər Prokurori çanədə şikat vığandəmone, hiç qıley nəticəş bıə ni. Mışğıl bımədəy ki, Rasim Mustafayev çe Naxcıvanə Respublika Mudafiə vəziri muavin Kərəm Mustafayevi bıyəy. Əv ıştən votedə ki, çey bıyə de prezidenti i vırədə çay peşomedə. Bı məmləkətədə çəmə sıxani məsedən, şımə sıxani əməsnin.

Meydan TV de ım məsələ əlağədar bə Ağdaş rayoni polisə idarə zanq jəşe, əyo votəşone ki, bə mətbuati məlumat doe umumən bəvon ğədəğən kardəşone. Respublika Daxili Koon Vəzarəti mətbuatə xidmətiədən bə muxbiri parson cəvob doeku imtina kardəşe.