Az.R vıjoronədə kali ərzağ və tərəvəzon ğıymət erjon bıə.
Az.R daxili vıjoronədə kartof, kələm və piyozi ğıssə muddətədə 100%-sən vey boho bıe bə xeyli ğeyli-ğali səbəb bıəbe. Boku hokuməti ım məhsulon ğıyməton bə səhmon eğande ro bə konkret tədbiron dast ğandışe. Çimi, həmən tojə məhsoulon bə vıjor beşe bə ım tərəvəzon ğıyməton saru eqınie səbəb bıe.
“Faktxəbər.com” İğtisadiyyat və Di təsərrufati vəzarəton bahəm elan kardə məlumat bəştə əhandon nəzə rosnəşe. Im vəzarəton doə xəbəku məlum bedə ki, çəvon vində tədbiron sayədə həmonə məhsulon ki, ğıymətonşon xeyli dərəcədə ros bıəbe, bəştə navonə səviyyə eqıniə. Isət kartofi vıjorədə 1 kilo ğıymət 70 kopik, marketədə 79 kopike. Piyozi ğıymət muvafiğən 70 kopik və 1 mənot 9 kopik, kələmi ğıymət bə 1 mənot və 1mənot 29 kopike.
Vıjoronədə ordə ğıymətiən saru eqınie çəş kardə bedə. “Karat Holdinq” Məhdud Məsuliyyətinə Cəmiyyəti elan kardəşe ki, ıştə istehsal kardə “Karmen” markaninə 1 kisə 50 kiloinə ordə ibıno həvatə ğıymət 1 mənot erjon kardəşe, çe 25 mənot 95 kopikiku bə 24 mənot 95 kopik eğandəşe.
İyo məxsusi ğeyd karde lozime ki, Respublika əhali ərzağə təchizati çe idxaliku bə jidasti vəziyyət eqınie, həmən xarici və daxili ticarəti çe monopoliston inhasarədə bıe, hokuməti daxili vıjoronədə ğıyməton bə səhmon eğande, ğıyməton suni boho karde vəy se imkani xeyli bə kam kardedə. Bə Devlətə Statistika Komitə elan kardə rəsmiə rəğəmon əsasən Ğəzəxıstoni bə Azərbaycan idxal kardə taxıli həcm ponə sori yanvarə manqi nisbətədə 4,7 kərə ziyod bıə. Çe Ukraynaku orəxnə 2 manqədə 7 həzo ton molə qujd ixrac kardə bıə ki, ımən bə ponə sori nisbətədə xeyli veye.
