“Dini etiğadə azadi həxədə” tojə ğanun keynə ğəbul bəbe?

Dəvardə sori dekabrə manqi 5-ədə “Report” aqentiyyəti bə MM dini təşkilaton dair komitə sədr Siyavuş Novruzovi votəyon istinadən xəbə doəşbe ki, Parlamenti nezə sessiyanədə “Dini etiğadə azadi həxədə” tojə ğanuni layihə muzakirə bəbe.

“İslamazeri” sayt bə əhandon yod vardedə ki, Az.R-ədə jiqo qıley ğanun 1992-minə sori ğəbul bıə. Tosə 2015-minə sori bey 10 kərəsən vey əvəz və əlavon kardəşone. Isət ğəror heste ki, ey təmom de tojə ğanuni əvəz bıkon.

Əsas məsələ bımədəy ki, orəxnə sorinədə devləti tərəfo de dini onoemonon ko kardə bənə bə Dini Təşkilaton aid Devlətə Komitə və çey tono Mənəvi Molyəton Təbliğ kardə fond,  Prezidenti Adminstrasiyadə bə dini məsəlon dair şebə, çey nəzdədə Boku Beynəlxalğə Multikulturalizmə Mərkəz, Azərbaycani İlahiyyətə İnstitut və həniən diqər təşkilaton soxtə bıə. Yəğin ki, jıqo təşkilaton vəzifə və funksiyon idarə kardə maddon tojə ğanunədə nişon doə bəbe.

Isət həmonə xəbəku 4 manqisən vey vaxt dəvardə, əmo hələ ki, im tojə ğanuni muzakirə barədə jı qəp şedəni. Hətto “Musavat.com”sayti muxbiri bə MM muraciətən benəticə mandə. Həmonə ğanuni layihə barədə bə çey muxbiri parsi Siyavuş Novruzovi ıştəniən məğbul cəvob doəş ni. Ehtimal çımədə ibarəte ki, tojə ğanunədə kali maddon bə muxtəlifə fikron səbəb bıə, bə qorə həmonə layihə sənibəton nıvışte zərurət bə meydon beşə.

Respublika Televizionədə de dini mevzu əlağədar bərnamon bardəkəsonən orəxnə vaxtonədə rə-rə əvəz bıe bə cəmiyyəti maraği səbəb bıə. Mass-media numayəndon tədğiğati bəpeş məlum bıə ki,  həmonə dini bərnamon bardəkəson çe bə Dini Təşkilaton dair Devlətə Komitə tərəfo təyin bedən. Nəinki televiziya rəhbəriyyəti, hiç Ğəfğazi Mısılmonon İdarən bı koy mudaxilə karde ixtiyarşon ni.

Əlavən vote lozime ki, Şeyxulislam Allahşukur Paşazadə təvəlludi 70-minə sorəqardışi ğeyd karde ro tədbiron hozo karde məsələ devləti sərdari bə Dini təşkilaron dair Devlətə Komitə rəhbəriyyəti həvalə kardəşe.