Az.R-ədə İroni cıvonon dustiəti haftə bino bıə

İroni de Az.R iğtisadi, mədəni və dustiəti əlağon şe-şe inkişaf kardedə, həniən zumand bedə. “Faktxəbər.com” bə İğtisadiyyatə Vəzarəti istinadən vəzir Şahin Mustafayevi de ıştə İronıjə həmkar vəzir Reza Rəhmani didori barədə bə əhandon məlumat doəşe.

Şahin Mustafayevi orəxnə 5 sorədə çəmə məmləkəton arədə hartərəfinə əlağə və rabiton xeyli inkişaf karde, İroni bə Az.R iğtisadiyyati noə sərmoyə bə 3 milyard 400 milyon dollari rəse, Naftəçolədə Avtomobilə zavodi bə istifadə doe, Pirallahiədə dəvocatə zavodi inşa bino noe, dəvardə sori çəmə keşvəron arədə ticari devriyyə 74 % ziyod bıe həxədə qəp jəşe. Ironi sənaye və ticarəti vəzir Reza Rəhmani har dı qılə devləti prezidenton bə çəmə məmləkəton arədə hartərəfinə əlağon inkişafi məxsusiə diğğət doe ğeyd kardəşe, votəşe ki, ısət çəmə məmləkətonədə de biznesi məşğul bıe ro bo sahibkaron vey vərzinə muhit heste.

Aprelə manqi 17-ku Az.R-ədə İroni cıvonon dustiəti haftə bino bıə. Bı barədə məlumat bə “Faktxəbər”i çe İroni Boku səfarətxonəku məlumat doəşone. Im haftə ki, tosə apreli 22 dəvom bəkarde, bə çey proqrami muvafiğ İroni cıvonono ibarət numayəndon de Heydər Əliyev Mərkəzi, İçəri şəhər, Ğız Ğalə, Xolıçə Muzeyi oşno bəben, Fəxri və Şəhidon Xiyabanon ziyarət bəkarden, de Boku Devlətə Universiteti Şərğşunasi kafedra farsi zıvoni omutə tələbon vindemon dəbəvunien.

Əvon bə Nəvcivan səfəri çərçəvədə de çəvrey Cıvonon və Vərzeşə Vəzarəti rəsmiyon, Nəxçivani Devlətə Universiteti tələbon vindemon dəvəbunien, Əshabi-kəhf ocəği ziyarət bəkarden. Çəyo bə Ğuba rayon dəro bəqınien, de Ğuba Tuməbırə Kompleksi oşno bəben.