De Qəncə hadison əlağədar məhkəmədə əsil həğiğəton bə oşko beşedə

De Qəncə hadison əlağədar dəstqir bıə məhbuson muhakimə Sabunçi rayoni məhkəmədə dəvom kardedə. Huğuğə mudafiəkar Oqtay Quləliyev 18 nəfəro ibarət 2 qılə qrupi muhakimə iclasonədə iştə vindəyon barədə bo “Azadlıq.info” sayti qəp jəşe.

Orəxnə məhkəmə iclasonədə Qəncə şəhəri Kəpəz rayoni polis şebə həmkaron ifadə doəşone. Çəvon votəyonku məlum bıə ki, bəvon ponə sori iyuli 10-minə ruji Gəncə İcra Hakimiyyəti bina vədə mitinq və mumkun  iğtişaşon barədə məlumat və təlimat doəşonbe. Əmo həmonə ruji 100 nəfəro ibarət polisə ğıvvə bə meydon besilah vığandğşone. 2 nəfər polisə zabiti ğətli vaxti polisə həmkaron çəvonku 70-100 metr diəro bıən. Ğatil ım zabiton kıştə bəpeşt bemaneə meydono beşə şə, polisonədə hiç kəsi ey dəstqir karde ro cəhd kardəş ni.

Dıminə ğəribə hol bımədəy ki, istintaği materialonədə təğribən 50 nəfər iğtişaşəkon bə polison de sıği həmlə karde votə bedə, əmo ım həmlə nəticədə polison arədə hiç kəsi xəsarət sə nişe. Imən ğəribəy ki, ısət muhakimə bıə odəmonədə hiç kəs həmonə sığ ğandəkəson arədə bıə ni. Məhkəmədə ifadə doə polison əksəriyyət ım muttəhimon iminə kərə vinde etiraf kardəşone.

Oqtay Quləliyevi ımən ğeyd kardəşe ki, məhkəmə iclasonədə vağeə bıə muzakiron nişon dodən ki, çe prokuratura de Qəncə hadison əlağədar tərtib kardə İttihamə Akt soxtəy və pesoxtəyono ibarəte.

Quləliyevi ım məhəkəmonədə ğeyri-ğanuniə hərəktəton, həmən orəxnə vaxton Respublikadə bə xeyli cinayətə tərkibinə əməlon çe prokuratura tərəfo pape nıbe əlağədar bə Sər prokuror Zahid Ğaralovi de ojə məktubu muraciət kardəşe, əv dəvət kardəşe ki, de şəhrıvandon ğeyri-ğanuniə dəstqir karde, bəvon işqəncon doe əlağədar muvafiğə tədbiron bıvindo.

Apreli 22-ədə ım məhbuson nezə odəmon Qəncə şəhəri İcra hakimiyyəti bina vədə etirazə aksiya dəvunie çəhd kardəşone, əmo polison bımi imkan doəşon ni.