AŞPA ıştə ğətnamədə çe Boku hokuməti korrupsiya əməlon ğeyd kardışe.

Avropa Şura Parlamentə Assambleya Strasburğədə dəvardə Əvəsorə sessiyadə bə mutəşəkkilə cinayətəti və lırdinə pulon şışte dair ğətnamə ğəbul kardışe. Bı sənədədə Az.R numayəndon tərəfo xeyli – 2 milyard 900 milyon dollar məbləğədə lırdinə pulon şışteku, çe Avropa devlətə xadim və deputaton de rışvə roy bə dast sə faktonku norohəti ifadə bedə.

Sənədi muəllifon ğeyd kardəşone ki,  bı koədə biznesmenon, mutəşəkkilə cinayətkarə qrupon, və hokuməti uzvon iştirakşon bıə və məsuliyyətən çəvon qiyədəy. Azərbaycano puli yolə hissə çe Danske Banki Estoniya filialiku bə muxtəlif adresaton vığandəşone. Avropa Parlamenti hələ 2017-minə sori Boku hokumətış bə ım fakton obyektiv təhğiğ karde dəvət kardışe, əmo tosə ısət bı koədə ey hiç qıley qəm şodoəş ni, bı çinayətə əmələdə iştirakış bıə deputat və devlətə məmuron munasibətədə hiç qıley təhğiğatə ko bardə bıə ni.

Sənədədə votə bedə ki, Az.R-ədə korrupsiya bı ğədər intişar peydo karde səbəbonədə qıley mustəğilə şəhrıvandə cəmiyyəti və Mass-mediya fəaliyyəti hokuməti tərəfo tosnie, çəvon fəaliyyəti vəy seye. AŞPA uzvon de ım ğətnamə Boku hokumət lırdinə pulon şıştə əmələdə qınokarə odəmon bə məsuliyyət cəlb karde, çe mustəğilə şəhrıvandə cəmiyyət və İnformasiya vasiton fəaliyyətə azadi bərpo karde, çe AŞPA bə “Azərbaycani landromat”i dair 2017-minə sori ğətnomə tələbon bə vırə rosnie vanq kardəşe.

“Forbes” mahnamən Boku hakim elita numayəndon çand milyard dollar lırdinə pulon de Avropa kali siyasiə xadimon bə ico şışte barədə qıley mufəssəl məğalə dərc kardəşe. Bə ım məğalə əsasən Amerika Antikorrupsiya İnstituti prezident Bork Faylsi votəşe ki, Az.R-ədə bə entexabaton musbətə ray doe ro bə Avropa Şura numayəndəon har kəsi 50 həzo dollar rışvə ovoştınie barədə çəmə dastədə banki sənədon hestin. Tosə ısət çe AŞPA 13 nəfər uzv  ıştə vəzifəku xaric kardə bıə.