Az.R de İİR arədə hərbi sahədə həmkarəti perspektivon
Mockva şəhərədə VIII Beynəlxalğə Əmniyyətə konfransədə İİR və Az.R numayəndonən iştirakşon bıə. Bi konfransi çərçivədə İroni Mudafiə vəziri muavin briqada qeneral Mohəmməd Əhadi de Az.R mudafiə vəziri muavin qeneral-leytenant Kərim Vəliyevi vindemon dəvuniəşe. Im didorədə dı qılə devləton arədə hərbi həmkarəti perspektivon muzakirə bıə.
“İran.ru” sayt İroni hərbi potensiali barədə analitik məğalədə nıvıştedə ki, tosə İslamiə İnğilabi İron ıştə hərbi təchizati çe Qərbi devlətonku hıridəbe. İnğilabi bəpeş əvon bə İroni silah həvate səpe embarqo noşone. De İraği 8 sornə muharibədən çe İroni silahə təchizatədə ehtiyoc bə əməl oməbe.
Muharibəku dəvardə peşnə soronədə İroni ıştə Mudafiə Sənaye Kompleks onoşe. Əsasən de Cin və Rusiya ıştə hərbi həmkarəti inkişaf kardovnişe. Hətto 2010-minə sori İMT bə İroni silah həvate səpe noə embarqo çey mudafiə sənaye inkişafi və qəte nızınışe. 2015-2016-minə soronədə İroni de Rusiya 4 dviziono ibarət S-300 Zenitə Raketə Kompleksi təchiz bıe çey mudafiə ğodrət həniən bə barzə səviyyə ros kardışe. Isət çe İslamə Respublika mudafiə sənaye ıştə daxili ehtiyacon de muasirə silahon bə tam təmin kardə səviyyə omə rəsə. “Mobarez”, “Safir”, “Cəbalan”, “Zulfiğar” nominə tankon, “Simurğ”, “Kousər” , “Saeqah” hərbiə həvopeymaon istehsal kardedə. Bı rujonədə İroni Hərbiə Həvo Ğıvvon komandan Əziz Nəsirzadə elan kardəşe ki, “Kousər” nominə həvopeymaon istehsali həniən ziyod bəkarden.
İroni Kosmos Təşkilati raketə texnoloqiya istehsalədən yolə nailiyyəton bə dast vardəşe. Əmir Kəbir Universiteti rektor Əhməd Motəmədi bə “Farsnews” sayti votəşe ki, peyk istehsalədə İroni ıştə “Pəyam” raketi həniən təkmil karde imkanon hestışe. Ğeyr-əz ımi, co variantonən hestin ki, ayəndə vaxtonədə de əvon əlağədar tədğiğati koon dəvom bəkarden.
