Məşədi Dadaş məçiti dini icma uzvon Muğəddəsə Məryəm Məsumə kilsə ziyarət kardəşone.

Şri Lankadə bə kilsəon terrorə hucumi bənə dınyo mutərəğğiə co cəmiyyətion Az.R ictimaiyyətşən norohət karde. Dəvardə rujonədə Məşədi Dadaş məciti icma uzvon bə Boku Muğəddəsə Məryəm Məsimə kilsə şən, bə xristianon ıştə həmdardi numayiş kardəşone, kilsə soədə Həzrət Məryəmi abidə vədə vılə çanqə noəşone.

De kilsə yepiskop Vladimiri vindemonədə votəşone ki, Şri Lankadə terrorə əməlon iqlə bə xristianon ne, bə həmə bəşəriyyəti əleyh cinayətə əməle. Azərbaycanədə mısılmonon de xristianon həmişə sulh və bəradərəti muhitədə jimon kardəşone, çimi bə çətonən jıqo bəbe. Çəyo ım terrorə tıpemononədə həlok bəkəson xatirə de i dəğiğə sukuti bə yod vardəşone.

Azərbaycanıjon muğəddəsə ocəğon bə ziyarət şe jıqoşə de ğanuni bə səhmon eğandə bəbe. Im fikir bə “Report” sayti Milli Məclisi bə Dini təşkilaton dair komitə sədr Siyavuş Novruzovi votəşe.  Ey ehandəşe ki, har sor xeyli azərbaycanıj bə xarici məmləkəton bo muğəddəsə ocəğon ziyarət karde şedən. Əvon bı səfərədə de kom odəmon təmasədə bedən, vindemonon dəvunidən, ğeyr-əz ziyarəti həni de kom əməlon məşğul bedən, bımon nəzarət karde ro muəyyən tədbiron vinde zərurie. De ımi əlağədar ehtimal heste ki, tojə ğanun ğəbul kardə bəbe. Bə “Turizmi həxədə” ğanuniən əlavon bəkarden.

Bə Dini təşkilaton dair Devlətə Komitə sədr Mubariz Ğurbanlıən de Rəməzonə manqi əlağədar monitorinqi barədə məlumat doəşe. Votəşe ki, de Rujə manqi əlağədar tədbiron Ğəfğazi Mısılmonon İdarə muəyyən kardə vaxti çərcivədə bəpe dəvuni. Im idarə doə fətva və ğaydə -ğanunon çokne icra bıe dair monitorinq dəvunie çe Dini Komitə vəzifəy. Komitə ısətən cımmə rujon məcitonədə monitorinq dəvunidə, Rujə manqədən ım nəzarəti dəvom bəkarde.

Bə “Faktxəbər.com” sayti əsasən Az.R-ədə Rujəmo mayə manqi 6-ədə bino bəbe.