Şəhrıvandon bə cı səbəb ıştə veki həvate məcbur bedən.

Aprelə manqi 26-minə ruji Boku Qonə Cinayəton Məhkəmədə de insonə orğanon həvate fakton əlağədar muhakimə prosesi dəvom kardəşe. Im cinayətə koədə 27 nəfər zərərdidə odəmon nom heste.

Əvon bənə şohidi bə məhkəmə cəlb bedən və ifadə dodən. Bı prosesədə 1 nəfər muttəhim heste, əvən taksi ərom 62 sinninə Vahib Xudadatove. Əv ıştəni taxsikor zınedəni, votedə ki, odəmon de mərami ıştə veki həvate piəşone, eyən bəvon vasitəkarəti kardəşe. Bımi ro har dı tərəfi bə ey 200 mənotiku tosə 1200 mənoti pul doəşone.

Zərərdidə Ramin Həmidovi məhkəmədə votəşe ki, 2 qılə hırdənım heste, əvoni vi-vay doe imkanım nıbe səbəbiku ıştə veki bə 11 həzo mənot həvatıme. Hiç qıley şikayət nime.

Zərərdidə Rufan Əhmədli ifadə doəşe ki, devalvasiya bə nav bankiku kredit peqətəşbe. Devalvasiya bə peş həmonə krediti oqırdınie imkanım nıbe. Bə qorə məcbur bim ki, ıştə veki bəhvatım. İnternetədə elan dome. De Xudadatovi vasitə ıştə i qılə vek bə 12 həzo mənot həvatıme. Çeyku hiç qıley şikayət və noroziəti nime.

Rasim Bayramovi bə hakimi nəzə rosniəşe ki, çey Zaur nomədə həmro maddi ehtiyaci səbəbiku ıştə vekış həvatəbe. Əvən ıştə xeyzoni quzəroni de təmin karde məğsədi bə ğəror omə ki, ıştə qıley veki bəhavato.

Zərərdidə Şakir Nağıyevi, Səid Ağayevi, Rustəm Ramazanovi, Elvin Məmmədoviən doə ifadon eyni məzmunədə bıən. Votəşone ki, maddi ehtiyaci səbəbiku de mərami ıştə vek həvatəşone, çe muttəhimiku şikayət nişone.

 “Faktxəbər.com” sayti bə DƏX istinadən məlumat doəşbe ki, insonə orğanon ticarəti təşkil kardə şəhrıvand Xudadatov Vahib Fəxrəddini zoə bə cinayətə məsuliyyət cəlb bıə.

Əlavən ğeyd karde lozime ki,  Respublikadə de ım əməlon məşğul bıə beynəlxalğə mutəşəkkilə cinayətkarə dastə fəaliyyəti həxədə xariçiə mass-mediadə məlumaton bə meydon beşedən. Əmo Az.R huğuğə muhafizə orğanon bı məlumaton əhəmiyyət dodənin.