Boku hokumət bə Məşhəd və Kərbəlo ziyarətşəkəson nəzarət bəkarde.

Çe Ğəfğazi Mısılmonon İdarə Ğaziyon Şura və Elmi Diniə-Şura işlasədə bə Dini Təşkilaton dair Devlətə Komitə sədr Mubariz Ğurbanli ıştə votemonədə ğeyd kardəşe ki, dini xadimon nəinki cımmə ruji xutbonədə, həmən sosialə şəbəkonədə bəpe aktiv fəaliyyət nişon bıdon, çəmə mustəğiləti mudafiə bıkon, ıştə siyasiə mevğe bə miyon bınon.

Əmo vey dini xadimon tərəddud kardedən, devləti siyasəti təbliğ kardedənin, həmən ıştə siyasiə mevğe bəyon kardeku dərəmedən.

Ğurbanli həmən votəşe ki, xums və zəkoti har kəs bəpe bəştə məciti bıdo. Im vəsaiton bəpe bə həmonə məntəğəonədə jimon kardə əhali diniə tələbon icra karde məsrəf bıbo. Xums və zəkoti çe məmləkətiku bə kəno bekarde ro doe əbıni.

Ey Məşhəd və Kərbəlo ziyarəton təşkil karde və dəvunie məsəlonən bə devləti nəzarəti ji dənoe, ğanunədə de ım məsəlon əlağədar muvafiğə əvəzon karde zərurət vacib zınəşe.  Əmo “musavat.com” sayti hokuməti ım təşəbbus tənğid kardəşe, bə əhandon nəzə rosniəşe ki, de İroni beviza rejim mevcude. Har sor çe Az.R-ku bə İron tosə 1 milyoni şəhrıvand səfər kardedə, çəvon arədə xeyli odəmon bə Məşhəd və Kərbəlo ziyarət şedən. Ərbəin mərasimədə iştirak karde ro 15 həzosən vey odəm bə İrağ ovaştedə. Anədə odəmi bə nəzarəti ji dənoe və ya çəvon vəy de inzuibati roy se mumkun nıbə koe.

Ğurbanli ımən ğeyd kardəşe ki, vəomə sentyabrə manqiku miyonə və ali məktəbonədə dini dərson tədris bəkarden. Təhsilə Vəzarəti de ictimaiyyəti əlağə şebə mudiri bə “Trend” sayti votəşe ki, miyonə məktəbonədə dini bənə qıley əleydə fənni tədris nəzərədə qətə bıə ni. 4-minə sinfiku tosə 8-minə sinfi “Jimoni zınəy” fənni tədris bedə. Bə im fənni tojə dərsə kitobon dinon barədə ətrofinə məlumaton daxil  kardə bıə. Vəomə tədrisə sorədə ım fənn de həmonə dərsə kitobon tədris bəbe.