Turkiyə polisi azərbaycanıjə dini fəal dəstqir kardəse.

Nardarani hadisəku 3 sorisən vey vaxt dəvardə, əmo Az.R hokumət bə dini fəalon əleyh hələən ım faciəku bənə vonə istifadə kardedə. De cey tələbi dini fəal Elnur Mehdiyev Turkiyədə dəstqir bıə, qımon heste ki, ey bə Boku deport bəkarden.

Çey əvlodon bə Meydan TV məlumat doəşone ki, Mehdiyevi Turkiyədə jimon karde ro ğanuniə sənəd hestışe, çey vəkili ey bə Azərbaycan deport nıkarde barədə bə Turkiyə həmə huğuğə mudafiə təşkilaton, hətto bə prezident Rəcəb Təyyub Ərdoğaniən muraciət vığandəşe.

Elnuri nezə odəmon həmən votəşone ki, cey de Oəncə icra sərdar Elmar Vəliyevi konflikt  Nardarani hadisə bə nav bino bıəbe. Vəliyev dindarə odəmon təhğir kardeədə Elnuri bımi etiraz karde səbəbiku Vəliyev ey bə zindon dənoe ro fırsət nəvedəbe. Nardarani faciə bə peş Elnuri nomən bə ım hadison anqıl kardışone. Hərçənd ki, əv həmonə vaxti Kərbəloədə ziyarətədə bıe. Polison Qəncədə bə çey kə silah noşone ki, ey dəstqir karde ro dastədə vonəşon bıbo. Bə qorə Elnur bə Qəncə onıqarde, çe Kərbəloku bə Turkiyə dəro qınie. Çə vaxtnəku əyo jidə. Bə dindarə məhbuson ailə hərdəm maddi komək vığandedəbe. Elnuri əvlodon Boku hokuməti Turkiyəku ey dəstqir karde tələbi əsasə səbəbiən çey bə diniə məhbuson ailon komək kardeədə vindedən.

Elnurşon apreli 24-ədə dəstqir kardə,  mayə manqi 1-minə ruji bə Kuç , yəni bə Deportasiya idarə bardəşone. Bə çey vəkili votəşone ki, Elnur Mehdiyev de Turkiyə ne, əleydə qıley devləti ittihami oqətəşone, nezə vaxtonədə de çey deporti əlağədar lazımi sənədon hozo bıe bəpeş ehtimal veye ki, deport kardə bıbo.

Təqribən 1 manq çimi bə nav co qıley dini fəal, Anar Cabbarovən de Boku hokuməti tələbi Turkiyə polisi dəstqir kardışe, bə Az.R təhvil doşe. Çey nezə odəmonən Anari bə dini məhbuson ailon maddi komək karde qorə bə Boku hokuməti qəzzəbi hədəf bıe votedəbin.