Qəncə hadisə məhbuson məhkəmə bə təxir eğandışone.
Huğuğə mudafiəkar Oqtay Quləliyev çe Qəncə hadisə məhbuson Boku Sabunçi rayoni məhkəmədə dəvardə muhakimə vaxti vağeə bıə beəmonə və beysurə hadsiə barədə bə ictimaiyyəti xəbə rosniəşe.
Məlum bıə ki, muttəhim Şahin Verdiyevi infarkt jəşebən. Əmo əv çe Penitisiar xidməti Mərizxonəku məcburən bə məhkəmə vardəşone. Həmə, hakimən daxil vindedəbin ki, çey bədəni i tərəf iflice, əv de 2 nəfər polisi koməki bə zal şıkırnieşone. Çey sıvvət infarkti təsiriku şat, həmən kavu bıəbe. Hakim Dadaş İmanovi məhkəmədə iştirak kardə odəmon bə jiqo beəmonəti etirazi məhəl noəş ni, ğəror doşe ki, muhakimə dəvom bıkardo. Çimi bə peş məhbus Asif Cavadovi holyət kardəşe, qıniə bə zəmin. Co qıley məhbus Həbib Ğurbanoviən elan kardəşe ki, bə hakimi jıqo beysurə əməli qorə ıştəni bəkışte. Jıqo vəziyyətədə İmanov məcbur bıə ki, bə təcili tibbi koməkə xidməti muraciət bıkardo. Omə doktoron Verdiyev və Cavadovi səhhəti kritik bıe etiraf kardəşone və əvon bə mərizxonə bardəşone. Məhkəməən bıə təxir eqıniə.
Oqtay Quləliyevi ıştə nıvıştəyədə ki, “Azadlıq.info”bə əhandon edaştəşe, bə cəmiyyəti muraciət kardəşe ki, bə jıqo beəmonə, beədalətinə hərəkəton fəal etiraz bıkon.
Çimi bə peş Quləliyev bə “Bandotdel” dəvət kardəşone. Ey bə “Turan” informasiya Aqentiyyəti bı barədə doə məlumatədə votəşe kİ, həmonə idarə rəis və diqər həmkaron dey molağat bardəşone, de çey “Feysbuk”ədə nıvıştə statuson əlağədar ıştə norohəti bey rosniəşone. Həmonə statuson əksərən de işqəncəon və Qəncə hadison əlağədar bıən. Quləliyevi həmən votəşe ki, bə Qəncə hadisə məhbuson doə işqəncə fakton təhğiğ karde zərurət bə “Bandotdel”i rəisi nəzə rosniəşe.
Mayi 7-minə ruji Qəncə hadisə məhbusə valideynon çe Prezidenti Adminstrasiya vədə etirazə aksiya dəvunie cəhd kardəşone. Polison çimi və səşone, valideynonədə 2 nəfər dəstqir kardəşone.
Həmonə məhbusonədə 3 nəfər – Səbuhi Rəcəbov, Qulmirzə Nuruzadə və Eyruz Hacıyevi mayə manqi 6-minə rujiku bə ənəhardə aksiya bino kardəşone. Im xəbə bə “Azadlıq.info” çəvon əvlodon rosəşone.
