Boku zindononədə məhbuson qonə vəziyyət

Beynəlxalğə Huğuğə Mudafiə Təşkilton bə çand bəşəm çe Əliyevi hokumətiku piəşe ki, de məhbuson ğeyri-insonə rəftori orəx bıdo, bəvon işqəncə doə zindonə koəkon jıqo ğeyri-ğanuniə əməlon vəy bısəno.

Siyasiə Məhbuson Mudafiə Mərkəziən hələ manqi çimi bə nav bə hokuməti əlağədarə orğanon muraciət kardəşbe ki, bə məhbuson işqəncə doə əməlonku dast bıkəşon, bə çəvon huğuğon riayət bıkon.

Əmo Boku zindononədə de məhbuson ğeyri insonə rəftori hələən dəvomış heste. “Azadlıq.info” mayə manqi 9-ədə xəbə doşe ki, Boku 6 numrəynə koloniyadə məhbus Ğuliyev Elsevər bə işqəncə məruz mandə. Zindoni nəzarətkaron əvşon çe lınqo səbəji ehaştə vəziyyətdə kuəşone, çəyo bə karser dənoəşone. Çey qıno bımədə bıə ki, səhhətış qıvonin bıe səbəbiku bə zindoni rəhbəriyyəti muraciət kardəşe ki, bey lazımiə dəvocat bıdo. Haliyədə çey səhhətədə problemon hestin, bə çey əvlodonən dey vindemon karde imkan dodənin.

Siyasiə Məhbuson Mudafiə Mərkəzi koordinator Oqtay Quləliyeviən bə “Amerika sədo” radio musahibədə votəşe ki, orəxnə vaxtonədə məmləkətədə repressiya və işqəncon xeyli ziyod bıə. Mudafiə Mərkəz jıqo fakton monitorinq kardedə. Əvoni həm bə dınyo cəmiyyəti nəzə rosnidə, həmən devləti muvafiğə vəsilə səlahiyyətinə məmuronku bə ım hərəkəton orəx doe tələb kardedə. Mərkəzi uzvon qırdə kardə işqəncə fakton əsasən bə 4 qrupi munasibətədə həməysə beysur və ğeyri-insoni bıə.  

2012-minə sori “Yevrovijni məhbuson” 29 nəfərin, çəvonədə 3 nəfər bə umrinə zindonə cəzo məhkum bıən.

Dıminə qrup 2015-minə sori  vağeə bıə “Nardarani hadisə” məhbusonin ki, 70 nəfərisən ziyod dindar məhkum kardışone.

Seminə qrup 2017-minə sori “Tərtəri hərbiciə” məhbusonin ki, bəvon doə işqəncon nəticədə 8 nəfər ğətl bıə.

Çominə qrup ponə sori “Qəncə hadisə” məhbusonin ki, rəsmən 51 nəfəri məhkəmə  bino bıə, 10 nəfərisə ziyod dindar ğətl kardəşone, 11 nəfəri nom bə axtarış doə bıə. İm 4 qılə qrupi odəmon istintağədə bə məhbuson şiddətinə işqəncəon doəşone, de soxtə ittihami əvon bə zindon dəğandəşone.