Azərbaycan Respublika ruhanion iyən siyasi fəalon bəpe ozod bıbun.

İslamçiyə məhboson həğ-huğuği mudafiə əkə kamissiya uzvon ım kişvərədə həmonə dindaron iyən siyasi fəalon ozodəti ki bə kişvərədə bıə iştimai nohəxion iyən iğtisodi fəsod etıroz karde xoto həbsin tələb kardışone.

Bə İrirb raporti əsos ım kamissiya fəalonku qıləy ni Ruşən Əhmədli zinə Bokuədə votışe: Azərbaycan Respublikaədə siyasi məhboson iyən ruhanion ozodəti royədə mubarizə bənə milləti umumiyə iradə əvəz be.

Azərbaycan Respublika Xalığ Cəhbə partiya muavin Foad Ğəhrəmanli həm ım iclosədə votışe: Nardaran, Qəncə iyən Tərtərədə hadisəon stalin dıvranədə repressivə vəziyəti bə yod vardedə.

Əv bə uməvion əleyh İmom Husein(ə) ğiyami işorəş karde və votışe: har zəmon ki zılm islamiyə ummətədə hakim bıbu inson bəpe ıştə ailə, mol-servət iyən coniku dəvardo və de zılm mubarizə bıkə.

Azərbaycan Respublika mısılmonon i bemon hərəkati muavin Elçin Ğasımev həm bə Azərbaycan Respublika dıvləti nadırıstə siyasəton işorə və təkidış karde ki ruhanion iyən dindaron sima və obzari bevəcə nışo doe sahədə Boku dıvləti plan məğlob bəbe boçi ki Azərbaycan Respublika şəhrvandon qırd mısılmonin.

İslam partiya jenon şobə yol Xanom Norəstə  Ebrahimeva həm həminə iclosədə bə kişvərədə hakimə tars və dəhəşt atmosferi işorəş ka və votışe: hətto iclosonədə çı Qəncə hadisə məhboson jenon həyot həmroonku xoto kəşə çəvon tarsi bois bıdə.