Şəki şəhəri polisxonədə şəhrıvand Ğalib Məmmədov kıştəşone

Şəki şəhəri 1988-minə sori təvəlludinə sakin Məmmədov Ğalib polisxonədə vəfot kardəşe. Şəhəri polis şebə rəsmən im jıqo izah kardəşe ki, quya ey ıştən ehaştəşe. Əmo Məmmədovi moə votedə ki, çey fərzənd polison kıştəşone, çunki çey bədənədə xeyli ğançurə rizon hestin.

Im fakt sənibəton nişon dodə ki, Boku hokumət bə şəhrıvandon munasibətədə beəmonə, beysurə repressiya əməlon orəx doe fikirədə ni. Zindononədə bə dini və siyasi məhbuson işqəncəon hələən dəvom kardedə. Siyasiə Məhbuson Huğuğon Mudafiə Komitə sədr Oqtay Ouləliyev mayə manqi 13-ədə bı səfə bə Sər Prokuratura vanq kardəşone. Bı barədə Quləliyevi nıvıştəyon Meydan TV bə cəmiyyəti təğdim kardəşe. Quləliyevi nıvıştəşe ki, “əvon pidəşone ki, əmə çəvon bə əhali sə vardə mısibəton lol bımandəmon. Bə beqınoə odəmon doə işqəncəon, əvoni ğətl karde bə zıvon məvəmon, şəhrıvandon de şər və bıhtonə maddəon məhkum karde ıştə çəşon vi bıkəmon, çəvon huğuğon mudafiə məkəmon. Muxtəlifə devlətə vəsilə məmuron bəmı xəbə vığandedən, təzyiğ kardedən ki, az ım koyku dast bıkəşım. Əmo az bə xalqi sodə zəhmətkəşə odəmon doə jıqo ğeyri-insonə işqəncə fakton həxədə məseədə bə dəhşət omedəm və ğətiyyən fikrım ni ki, bə ım beinsonə əməlon tam bışənım, bəvon etiraz nıkəm.”

Əlavən bıvotəmon ki, Oqtay Quləliyev mayə manqi 6-ədə bə Daxili Koon Vəzarət dəvət kardəşonbe. Əyo bey çəşnavi doəşonbe ki, ıştə ım huğuğə mudafiə əməlonku dast bıkəşo.

Quləliyevi bə Azadi Radio ıştə musahibədə votəşe ki, huğuğə mudafiəkaron  mayə manqi 4-minə ruji Bə Repressiya və İşqəncon Əleyh Komitə onoəşone. Im Komitə huğuğə mudafiəkaron, jurnaliston, işqəncə nəticədə və polisi tərəfo de qolulə ğətl bıə odəmon əvlodon, həmən iştimai siyasiə fəalono cəmi 18 nəfəro ibarəte. Məğsədımon Respublikadə bə repressiya və işqəncon əleyh mubarizə barde, həmən bə jıqo əməlon məruz mandə şəxson və bə çəvon ailə uzvon koməkəti kardeye.