Az.R Devlətə Statistika Komitə ğeyri-dəğiğ məlumaton dodə

Az.R Devlətə Statistika Komitə ımsori sıftənə 3 manqi səkıştə rəğəmon elan kardəşe. Əyo nişon doə bedə ki, bı devr`ədə çe əhali mənfəət bə ponə sori nisbətədə 4,6% ziyod bıə. İğtisadşunas Nemət Əliyevi Komitə ım məlumat tənğid kardəşe, votəşe ki, ım məlumat səhih ni, cunki, çey doə co məlumatədə votə bedə ki, ponə sori ım 3 manqədə bə əhali 1 nəfəri eqıniə mədaxili miğdar 1280 mənot, ım sori həmonə muddətədə isə 1275 mənot, yəni 5 mənot, faizə nisbətədə isə 0,4% kam bıə.

Ey həmən ğeyd kardəşe ki, Statistika Komitə məmləkətədə infilyasiya 2,1% bıe barədə votəyən çe həğiğətiku diəroə rəğəme. Çunki rəsmi rəğəmonku məlum bedə ki, bə məmləkət daxil bıə idxalə məhsulon ğıymət 30% boho bıə. Imi vıjoronədə məhsulon ğıymət de miyonə hisobi 14% ziyod kardəşe. Imən əhali maddi jimoni səviyyə barz bıe barədə Statistika Komitə votə fikron bə du bekardedə.

Nemət Əliyev ıştə “Fasebook” səhifədə nıvıştedə ki, bə keşvəri iştisadiyyat omə xariciə sərmayəon miğdarən sorbəsor saru eqınidə. De dəvardə sori 3 manqi muğayisədə 297 milyon dollar, və ya 36% bə kam bıə. Orəxnə 5 sori dinamika oşko nişon dodə ki, ım tendensiya dəvomine. 2015-minə sori sıftənə 3 manqədə xarici investoron bə Respublika istisadiyyati 1,6 milyard sərmayə noəşonbebu, 2019-minə sori 3 manqədə ım rəğəm 519 milyon dollar bıə, yəni 68% bə ji eqıniə. Ey ımən ğeyd kardəşe ki, Az.R-ədə iğtisadi tənəzzuli dəvom həmən de jiqo qıley əlaməti zınə bedə ki, məmləkəti daxilədə istehsal bıə məhsulon ticari devriyyə orəxnə 1 sorədə 25%,  5 sorədə isə 55% bə kam bıə.