Sər Prokuratura bə O. Quləliyevi orəxnə çəşnavi doəşe.

Az.R Sər Prokuratura de Siyasiə Məhbuson Huğuğon Mudafiə Mərkəzi sədr Oqtay Quləliyevi fəaliyyəti əlağədar qıley məlumat bə ictimaiyyəti edaştəşe.

Həmonə məlumatədə votə bedə ki, “Oqtay Quləliyev ıştə “Fasebook” səhifədə respublika huğuğə-muhafizə orğanon bə cinayətkaron əleyh bardə tədbiron səpe soğnə eğandedə, çe qəsdo ğərəzinə məlumaton pevolo kardedə ki, de ımiən çey bə məmləkətədə ictimai-siyasi asayişi darıştə məğsədi xidmət karde muəyyən bıə. De ım fəaliyyəti əlağədar Quləliyev bə Sər Prokuratura dəvət kardəşone. Bə çey nəzə rosniəşone ki, əv ıştə fakton bə Respublika ğanunon muvafiğ de devlətə oqğanon vasitə səhih kardənine. Bə ey çəşnavi doə bıə ki, qirəm əv cimi bə peşən ıştə jıqo beəsasinə fakt və məlumaton pevolo bıko, çey barədə ciddiə tədbiron vində bəbe.”

Bə yod buəmon ki, Oqtay Quləliyev mayə manqi 6 və 12-minə rujon sıftə bə DKV, çəyo bə Sər Prokuratura vanq kardəşonbe ki, əv bə məhbuson doə işqəncə fakton bə cəmiyyəti nəzə nırosno. Quləliyeviiən votəşbe ki, bə məhbuson jıqo ğeyri-insonə işqəncə fakton barədə hiç vaxt tam nibəje.

Çe Sər Prokuratura, həmən DKV bə huğuğə mudafiəkaron jiqo təzyiğ və şantajə siyasət çəvon bəştə ım curə cinayətə əməlon jiqoşən dəvom doe əzmi numayiş kardedə.

“Azadlıq.info” bə Qəncə hadisə məhbuson doə işqəncə fakton barədə tojə məğalə dərc kardəşe. Məlum bıə ki, de ım hadison əlağədar 200 nəfər dindar dəstqir bıə. Çəvonədə 80 nəfər bə cinayətə məsuliyyət cəlb kardəşone. Əmandəyon tosə 30 sutka inzibati cəzo səşone. Im odəmonən har ruj polisxonədə kudənbən, bə fiziki cəzo məruz mandedənbən. Huğuğə mudafiəkaron, həmən ım odəmon əvlodon çe Prezidentikuş qətə de bə DKV bə həmə əlağədarə orğanon şikayət vığandəşone, əmo devləti ım vəsilə məmuron bımi hiç qıley reaksiya doəşon ni. Isət Sər Prokuratura bə Quləliyevi votedə ki, əv bəpe bəvon de muraciət karde roy,  ıştə fakton de  çəvon vasitə sərost bıko.