Şeyxulislam Allahşukur Paşazadə de Rujə İdi munasibəti mısılmonon təbrik kardəşe.

Rujəmoə manq bə orəx rəsedə. Samaxi Astrofizika Rəsədxonə bəştə bardə muşahidon əsasən bə “Sputnik Azərbaycan” sayti parsi doə cəvobədə elan kardəşe ki, tojə ovşum iyunə manqi 3-minə ruji de Boku vaxti saat 14: 03 dəğiğədə dabəme.

Ey bə ekvatori nezə məmləkətonədə 14-16 saati, ekvatoriku diəroə məntəğonədə isə 18-20 saati bədiqə vinde bəbe. Az.R əraziədə Şəvvalə manqi ovşumi iyuni 4-ədə şanqovəsey muşahidə karde mumkun bənine.

Şeyxulislam Hacı Allahşukur Paşazadə de Rəməzonə idi əlağədar bə mısılmonon təbrik votəşe. Ğəfğazi Mısılmonon İdarə pevolo kardə həmonə məlumatədə votə bedə ki, Eydul- Fitr bə insonon əzəmət və şodmoni bəxş kardedə. Bə xıdo şukur bıbo ki, çəmə mısılmonə bıyə və hovəon ım mubarəkə manqi dırozi ıştə ibadəti de ehtiram və fərəhi bə orəx rosnişone, bə Rujə idə şodmoni ğeyd karde səadəti nail bıən. Rəməzon mərhəmət və səvobə manqe. Bə insoni səbr, xeyrxahi, mərhəmət təqlin kardedə. Valideyn və əvlodon tono şe, bə səğır və beçizə odəmon şəfğət nişon doe, rəhmət şə nezə odəmon ğəbi ziyarət karde ım idə ruji mustəhəb əməlonədəy.

“Maide.az” saytən ımsornə Fitrə idi zəkati həxədə bə əhandon nəzə rosnidə ki, çey məbləğ 2 mənot, və ya 3 kilo qandım, kişmiş, bırz iyən bənə bımon ğida hardəyonin.

Uzrinə səbəbiku rujə qəte nızınəkəson bo har ruji 750 ğrəm qandım və ya 1 mənoti miğdarədə kəffarə pul avjor  kardəninin.

Bo ımsori Fırtə zəkati və kəffarə miğdar anədə muəyyən bıə, əmo har kəs çimisə vey avjor karde ixtiyarədəy.