Nardarani faciə məhbus Əbulfəz Bunyadovi səhhət xeyli qıvonine
Nardarani faciə məhbus Əbulfəz Bunyadovi səhhət xeyli qıvonin bıə. Bı barədə bə Meydan TV çey jimoni həmro Leyla Bunyadova məlumat doəşe. Ey votəşe ki, Əbulfəzi Penitensiar Xidməti Mualicə Mərkəzədə oqətedən.
Çəvrey şərait antisanitar vəziyyətədəy. Bənə bey 5 nəfər əliliən qıley qədə otağədə oqətedən. Əbulfəz iflic vəziyyətədəy, hərəkət karde zınedəni. Bey həmonə əlilə məhbuson xidmət kardedən. Orəxnə vaxtonədə nəinki xorək, hiç dəvoən ğəbul karde zınedəni. Bəmə manqədə 1 kərə dey vindemon karde icazə dodən. Çey səhhət anədə xərob bıə ki, orəxnə vindemonədə əvmon nızıne. Çey analizon bə şəhəri, klinika bardımone, əyo məlum bıe ki, antisanitariya nəticədə əv bə qıvoninə infeksiya mubtəlo bıə. Həmən hepatitə noxəşiku əziyyət kəşedə. Isət hiç çi harde zınedəni.
Eyən əlavə bıvotəmon ki, Əbulfəz Bunyadov Mısılmonon İbemonə Hərəkati İdarə Heyəti uzv bıe. 2015-minə sori noyabrə manqi 26-ədə hokuməti polisə ğıvvon Nardaranədə bə çey kə həmlə kardışone, çəvon soədə çand nəfər ğətl kardışone, əvşonən de qolulə je. Qolulə bə çey peştətiə qınie səbəbiku, Bunyadov ısət şikəste, hərəkət karde zınedəni. Jıqo qonə vəziyyətədə Boku Qonə Cinayəton Məhkəmədə çey muhakimə proses dəvunişone. Ey bə məhkəmə de həkimon nəzarəti, təcili tibbiə koməkə maşinədə, xərəki səpe vardedəbin. Məhkəmə hətto bə çey jıqo mayf və bekoməkə vəziyyətişən məhəl nınoe, çe prokurori bə çey əleyh ros kardə soxtə ittihami maddəon təsdiğ kardışe və boeyo 15 sorinə zindonə cəzo bırişe. Az.R ədliyyə sistemi bə dindaron beysurə munasibət həmən de jıqo fakti zınə bedə ki, Əbulfəz Bunyadov jıqo şikəstə vəziyyətədə ım muddəti sıftənə 3 sori Ğobustoni ciddi rejiminə sərpuşə zindonədə kəşənine.
