Boku hokuməti çe Avropa Şura numayəndə bə məmləkət ome icazə nıdoşe.

Məlume ki, Az.R-də siyasiə məhbuson vəziyyət daima çe Avropa təşkilaton diğğətədəy. De ım məsələ əlağədar Avropa Şura numayəndə Torhildur Sunna bı rujonədə bəpe bə Boku səfər bəkey, əmo respublika hokuməti bey bımi ro icazə nıdoşe.

Avropa de İrğəvonəti və Ənəduruməti Mubarizə Komissiya iyini 6-minə ruji Boku hokuməti bəştə ehdə peqətə təəhudon icra vəziyyəti barədə ıştə ray dərc kardışe. Əyo ğeyd kardə bedə ki, Az.R -ədə şəhrıvandə cəmiyyəti inkişaf karde ro hokumət munasib imkan soxtedəni, Ğeyri-Hokumətə Təşkilaton fəaliyyəti məhdud kardedə. İm Komissiya votedə ki, Az.R. bə Avropa Şura daxil beədə bəştə səpe peqətə təəhudon icra kardedəni, bey bı roədə nişon doə məsləhətonən əhəmiyyət dodəni.

Əlbəttə Boku hokuməti ım çur hərəkət karde səbəbonış heste. Çunki məmləkəti zindononədə de siyasi məhbuson beəmonə rəftor, bəvon doə ğeyri-insonə işqəncon eparçınie həni de hiç dıvuə qəpon mumkun bedəni. Məmləkəti huğuğə mudafiəkaron təşkil kardə bə Repressiya və İşqəncon Əleyh Komitə de jıqo vəziyyəti əlağədar bəyanat doəşe. Əyo votəşe ki, “orəxnə vaxtonədə beqınoə odəmon ğeyri-ğanuni dəstqir karde, bəvon qonə işqəncon doe və əvoni tələf kardə fakton ziyod bıən. Təəssufinə ko əve ki, XKV və Sər Prokuratura jıqo holon vəy se əvəzi, ım əməlon faş kardə şəhrıvandon bə hədəf sedən. Dəvardə sori de Qəncədə vağeə bıə hadison, həmən Tərtərədə 200 nəfər hərbiçion bə cinayətə məsuliyyət cəlb bıe əlağədar məhkəmə prosesonədə respublika huğuğə muhafizə orğanon tərəfo ım curə xeyli fakton bə dim beşin. İşqəncon nəticəku ısət məhbusonədə Aydın Ğurbanovi, Şahin Verdiyevi, Asif Cavadovi, Şahlar Rzayevi və həniən çand kəsi səhhətədə mışğılon bə əməl omə. Əmo Penitensiarə Xidmət əvoni mualicə karde ro hiç qıley tədbir vindedəni. Mayə manqi 11-ədə Şəki şəhəri polisxonədə şəhrıvand Qalib Məmmədov tələf bıə. Əmo tosə ısət bə ım cinayətə əməli dair əlağədar orqanon hiç qıley məlumat doəşon ni, məqəvuji ım odəmkıştə cinayətiən eparcınie pidəşone.