Az.R məhbuson miğdarədə Avropa məmləkəton arədə 3-minə vırədəy.

Çe Avropa Şura bə məhbuson miğdari dair elan kardə hesabatədə Az.R Avropa məmləkəton arədə 3-minə vırədə ğəror qətəşe. Əyo nişon doə bedə ki, çe Az. Respublika har 100 həzo nəfərədə 235 nəfər məhbuse.

Im məlumatədə həmən ğeyd kardə bedə ki, Azərbaycan bə narkotikə ticarəti qorə məhkum bıə məhbuson miğdarədən navonə keşvəron restədəy. İyo məhbuson 25%  de ım cinayətə maddə məhkum bıə odəmonin.

De Qəncə hadison əlağədar dəstqir bıə məhbuson məhkəmədə bə ittiham tərəfi kardə  ğeyri-ğanuniə əməlon dair tojə fakton bə oşko beşedə. Məhbus Toğrul Verdiyevi məhkəmədə votəşe ki, polison mınşon dəstqir karde. Rəis Ədalət Sadığovi mıku xəbə seşe ki, İronədə bıəş? Votıme – bəli. Xəbəş se – Ğumədə bıəş, nomoj votedəş? Təsdığım karde. Ey bə polison votışe ki, ım odəm İronədə, Ğumədə bıə, nomıj votedəbu, jəqo bə vətəni xaine.

Məhbus Orxan Yağnaliyeviən ıştə ifadədə şəhadət doəşe ki, əv ıştə nənə yas mərasimədə iştirak karde ro bə Qəncə oməbe. İyuli 11-ədə polison əvşon qəte 15 sutkəninə inzibati cəzo bırişone, vığandışone bə Samixi zindon. Çəyo sənibəton bə Qəncə Nizami rayoni polisxonə vardışone, rəis Ədalət Sadığovi votışe ki, 5 həzo mənot bıdə , tıni vadəmon. Az votıme ki, çımı qınom ni, boçi bəpe bəşmə anədə pul bıdəm. Ədaləti votışe ki, ımrə Azərbaycane, iyo ğaydə-ğanun ni. Tıni bə aksiyadə iştirakəkon siyahi dəbəğandem. Çəyo polison mınşon barde bə “atapleniya” dəbastışone. Anədə kuşone ki, cımı quşi pardə sie, ısət məsedənim, çımı vınişon arışte, anqıştonım çe kəybə arədə oqətışone. Jıqo işqəncon bə peş mınşon şodoe  bə kars, 3 sutkə nə ov, nə hardəy nıdoşone.

Yağnaliyevi ımən əlavə kardəşe ki, həmonə polisxonədə dəstqir bıəkəson ğızılə zinətə əşyaon- anqışti, dastinə, zəncir, hətto mobilə telefonon polison dızdiəşone, bəvon tosə ısət oqordıniəşon ni.