Az.R Səhiyyə vəziri bloqqerış bə məhkəmə doə.

Jurnalist Teymur Kərimov qıley internet saytədə ko kardedə. Mayə manqi 18-ədə Səhiyyə Vəzarəti vədə jolinə piket dəvuniəşe. Bə səbəb ki, çey moə onkoloji noxəşine.

Mərizxonədə bey vaxti-vaxtədə lozim bıə dəvocaton dodənin, daima çəvonku rışvə tələb kardedən. Axırədə mərizxonədə çeyku 500 mənotən rışvə piəşone, ım məbləği doe imkanədə nıbe səbəbiku, Kərimovi Səhiyyə Vəzarəti vədə ıştə penə oləton həvatə aksiya təşkil kardəşe.  Im aksiya bə peş prokuraturadə bı barədə izahat doəşe ki, çey moə bə xərçənqi mubtəlo bıe bə peş 4 qılə poynəşon həvatə, 3 manqədə bə çey mualicə 4 həzo mənot pul xarc kardəşone. Çey moə dəqıniə mərizxonə çe devlətie, bə qorə əyo noxəşinon bəpe bepul mualicə bıbon.

Im aksiya bə çəton Səhiyyə Vəzarəti  Kərimovi votəyon təkzib kardışe. Və əvış bə məhkəmə doe. İyunə manqi 10-minə ruji Nəsimi rayoni məhkəmə Səhiyyə Vəzarəti huğuği şəxs bıe qorə bə çey ros kardə iddia diə karde ğeyri-mumkun bıe barədə ğəror doşe. Əmo bloqer Kərimovi hənqomə de ımi onırəxe. Isət məlum bıə ki, Səhiyyə vəzir Oqtay Şirəliyevi ıştən şəxsən bə məhkəmə şikayət vığandəşe ki, ey de Cinayətə Məcəllə 147 və 148 –minə maddon, yəni de şər ğande və təhğir karde maddon muhakimə bıko. De ım maddon bə mığəssiri 1 soriku tosə 3 sori zindonə cəzo nəzərədə qətə bedə.

Hadison ım cur tiğoniə vaxtədə Teymur Kərimovi moə Fiqurə Kərimova iyuni 7-ədə vəfot kardəşe.

Dəvardə rujonədə, ictimaiyyəti məmləkəti səhiyyə sistemədə nırəsəyon muzakirə kardə vaxtədə prezident İlham Əliyevi bı sahədə ko kardə xeyli həmkaron de orden və medali təltif kardışe, bəvon fəxri nomon doşe. Vırəş heste bıvotım ki, vəzir Oqtay Şirəliyev çe prezident Əliyevi ailə nezə əvlodonədəy.