Boku hokumət jurnaliston təğibi dəvom kardedə.
Avropa huğuğə mudafiə, devlətə və diqər ictimaiə təşkilaton daima İlham Əliyevi hokuməti vədə tələb nodən ki, bəştə ehdə peqətə təəhudon muvafiğ, ıştə şəhrıvandon huğuğ və azadion təmin bıkardo. Əmo ım hokumət sıxanədə daima Avropa vədə ıştəni bənə demokratikə cəmiyyəti təqdim kardedə, əmələdə isə bə şəhrıvandon munasibətədə murtəce siyasət bardedə.
İyuni 12-ədə Biləsuvar sərhəd ovaştə məntəğədə jurnalist, “Xəbərman.com” və “Press-az.com” sayton resaktor Polad Aslanov DƏX həmkaron dəstqir kardışone. 2 ruji bədiqə ım təşkilati rəsmən elan kardışe ki, bə Aslanovi əleyh de Cinayətə Məcəllə 274-minə ( bə devləti xəyanət) maddə cinayətə ko bino bıə və bo çey sıftənə istintaği ro əv bə 4 manqi muddət dəstqir kardəşone.
Yurnalisti jimoni həmro Qulmirə Aslanova bo Meydan TV qəp jəşe ki, Polad bəştə jurnalistə fəaliyyəti qorə, konkret çe DƏX həmkaron de rışvəxorəti məşğul bıe barədə fakton bə cəmiyyəti rosnie qorə bə zindon dəğandəşone. Hələ 2 sor çimi bə nav əv ım təşkilati həmkaron bə Kərbəlo və Məşhəd ziyarəti təşkil kardə muəssisonku bə har zəvvari miğdari qorə rışvə qırd karde, bı səbəbən ım ziyarəti xidmətə məbləği şe-şe boho bıe barədə tədğiğatə məğalə nıvıştəşbe. Çimi bə peş Poladşon bə hərbiə xidmət səfərbər karde. Hərçənd ki, əv 29 sinnədə bıe, səhhətədəş ciddiə problemon - dılə noxəşi, xuni təzyiğ və vəzni nırəsəy bıe səbəbiku bo hərbiə xidməti bə vəc nomə sənədış hestbe. Ey ımsori aprelədə hərbiə xidməti bə orəx jə bəpeş ıştə tənğidiə nıvıştəyon dəvom kardışe. Imən bey səbəb bıe ki, əvşon de jıqo qonə ittihami bə zindon dənoe. Qulmirə Aslanova votəşe ki, əvon ailəvi de İroni ərazi ovaşte roy bə Naxçıvan şeədə Biləsuvari sərhədə məntəğədə oqətışone.
DƏX pevolo kardə məlumatədə isə iddia bedə ki, Aslanov bə xariciə orğanonkuş sə dəsturi muvafiğ, Az.R devləti əmniyyəti və mudafiə ğabiliyyəti zəif eğande ro bə huğuğə muhafizə orğanon əleyh mətbuatədə, iyən sosialə şəbəkonədə əvoni çe nufuzo eğandə nıvıştəyon pevolo kardəşe.
