Prezident I.Əliyevi budcə təşkilatonədə koəkon məvacib ziyod kardışe.

İyunə manqi 18-ədə Prezident İlahm Əliyevi sərəncom doşe ki, çe sentyabrə manqi 1-ku budcə təşkilatonədə koəkon manqə məvacib de miyonə hisobi 40 % ziyod bıbo. Meydan TV xəbə doşe ki, respublikadə minimum məvacibi məbləğ bə 250 mənoti bərəse. İmsornə fevrali 8-ədən Əliyevi jıqo qıley sərəncom doəşbe və minimum məvacibi məbləğ çe 130 mənotiku bə 180 mənot ros kardəşbe.

De ım məsələ əlağədar prezidenti de co-co sərəncamon muəllimon i ğismi məvacibon 20 %, Devlətə Muhafizə Xidməti, Mudafiə Vəzarəti, Devlətə Kemrukə Komitə, Ədliyyə Vəzarəti Penitensiarə Xidməti, Devlətə Miqrasiya Xidməti, Devlətə Əmniyyətə Xidməti , Devlətə Sərhədə Xidməti, Fevğəladə Halon Vəzarəti bə həniən diqər devlətə təşkilatonədə koəkon məvacibon 40% vey kardəşe.

De əleydə sərəncami Mərkəzi Entexabatə Komissiya sədri məvacib 3060 mənot, çey muavini məvacib 2845 mənot, katib 2110, komissiya uzvon məvacib isə 1920 mənot muəyyən kardəşe.

İm sərəncamon icra çe sentyabrə manqi 1-minə rujiku bino bəbe. Cəş kardə bedə ki, oktyabrə manqi 1-ku pension minimum məbləğən 160 mənotiku bə 200 mənot ros kardə bıbo.

Mustəğilə eksperton, həmən muxalifət bə Prezidenti ım ğərari tənğidi munasibət nişon doşone. Im jıqo izah kardışone ki, məmləkəti iğtisadiyyatədə tənəzzul hələn dəvom kardedə. Bə səbəbən hokumət budcədə ım əlavə xarcon mənbə bəpe nişon bıdo, əks təğdirədə əv mənoti devalvasiya karde məcburiyyətədə bəmande ki, budcədə nırəsəy pur bıkardo. Diqər təhlilqəronən ğeyd kardedən ki, prezidenti ım qəm şodoe səbəb siyasiey, çunki əhali kutləvi noroziyəti  çəvon siyasi fəaliyyət xeyli zumand kardəşe, hokuməti de ım roy jıqo noroziyətion vəy se pidəşe. Im sərəncamon icra muddəti bə sentyabr ovoştonieyən bə jıqo  məğsədi xidmət kardedə.