Boku hokumət jurnalisti bə devləti xəyanətədə ittiham kardedə

“Xəbərman” və “Press.az” sayton redaktor Polad Aslanov iyuni 14-ədə Devlətə Əmniyyətə Xidməti tərəfo dəstqir kardə bıə. Çey kədə axtarış bardəşone, kompyuter kamera və co informasiya ovdonon musadirə kardəşone. Isət ey bə devləti xəyanətədə ittiham kardedən ki, quya məxfiə məlumaton bə xariciə devləti dəvuniəşe.

Aslanov ım ittihamon rədd kardedə, votedə ki, ımon həmə de cey jurnalistə fəaliyyəti obaste, bə səbəb ki, əv çe Devlətə Əmniyyətə Xidməti həmkaron rışvə se fakton tənğid kardedəbe, əvoni bə cəmiyyəti nəzə rosnidəbe.

Beynəlxalğə “Bemarzə Reportyoron” təşkilati bə Polad Aslanovi əleyh ım ittihami soxtə zınəşe və hokuməti tərəfo çey təğib bıe məhkum kardəşe.

“Reallıq.info” sayti redaktor İkram Rəhimovən çe İlham Əliyevi koməkkar Əli Həsənovi barədə tənğidiə məğalə dərc karde səbəbiku 2018-minə sori oktyabrə manqədə dəstqir kardışone. İsət əvən de soxtə ittihami bə 5 sor 6 manq muddətinə zindonə cəzo məhkum bıə. Çe “Contact.az” sayti “Bemarzə Reportyoron” ım bəyanati barədə dərc kardə məğalədə ğeyd kardə bedə ki, Az.R mətbuati azadiə beynəlxalğə reytinğədə 180 məmləkəti arədə 166-minə vırədə mandedə. İyo hokuməti tənğid kardə KİV-on ya blok kardəşone, yaanki əvon məcburən məmləkəto bə muhacirət şən.

“Jurnaliston Mudafiə Mərkəz”iən ki, Nyu-yorkədə ğəror qətəşe, dəvardə həftədə Az.R de jurnaliston qonə vəziyyəti əlağədar bəyonat pevolo kardəşe. Bı bəyonatədən Boku hokumətiku bə çey korrupsiya əməlon tənğid kardə jurnaliston təğibi orəx doe və əvoni çe zindono vadoe tələb kardə bedə.

 Azərbaycani Sər Prokuratura çe Jurnaliston Mudafiə Mərkəzi de Polad Aslanovi və İkram Rəhimovi bə zindon dənoe əlağədar vığandə parsi cəvob doəş ni.

Əlavən ğeyr karde lozime ki, ım Mərkəzi dəvardə sori dekabrədə dəvuniə monitorinqədə Az.R zindononədə deştə peşə fəaliyyəti əlağədar 10 kəs jurnalisti məhbəsədə bıe bə oşko bekardəşbe.