İyunə manqi intiharə hadisəon.

Az.R-ədə intiharə hadison sorbəsor bey bedə. Bə “Nur-az.com” sayti iyunə manqi dırozi dərc kardə məlumaton əsasən 19 nəfəri ıştənış kıştə, 8 nəfər intihar kardəkəson jimoni xilas karde mumkun bıə.

İyuni 1-minə ruji Saatlı rayoni Dədə Ğorğud diy sakin 73 sinninə Umleyla Muradova ıştənış sutə. Həmonə ruji Ğubadə 30 sinninə Mustafayev Firudini ıştənış zəhrəlud karde kıştəşe.

İyuni 2-ədə İsmayıllı rayoni sakin Ramil Rəcəbəliyevi bəştə vəş jəşe. Mərizxonədə doktoron çey jimoni xilas karde zınəşone. Həmonə ruji Saatlı rayoni Qaralar diədə 82 sinninə Əbdulhəsən Əhədovi, Samixi Eldar diədə 2-minə kursi tələbə Bəsti Allahverdiyeva de ehaşte roy ıştənşon kışte, Boku Dıyokənoə bulvarədə 3 nəfəri dıyoədə ıştənış tosnie piə. Çəvonədə 2 nəfəri xilas karde mumkun bıə.

İyuni 3-minə ruji Boku sakini ıştənış 18-minə mərtəbəku şodoə. Ağdam rayoni Ğərədağli diədə Tağıyeva Pustə ıştənış ehaştə.

İyuni 14-ədə Qax rayoni sakini ıştənış ehaşte. Həmonə ruji Bokuədə moə deştə kinə ıştənşon çe bina 10-minə mərtəbəku şodoe, kıştışone.

İyuni 17-ədə Şəki Oxut diədə 14 sınninə nuəperəsi ıştənış ehaşte.

İyuni 19- ədə Gəncəvojə sahibkari ıştənış çe Ərazi Kemrukə İdarə vədə sutışe.

Manqi 20-21-ədə Boku, Masazır və  Sumğayıtədə cəmi 3 qılə intiharə hadisə vağeə bıe. 1kəs intihar kardə jen xeyləği jimon xilas kardışone.

İyuni 23, 24, 25-miə rujonədə Sabirabad şəhərədə qıley cıvoni ıştənış ehaşte, Bokuədə qıley moə deştə korpə əğıli ıştən çe “Koroğli” metro pardiku şodoe cəhd karışe, əmo əvşon xilas karde, Qəncə şəhərədə qıley cıvoni intihar kardəşe, çey jimoni xilas kardeyən mumkun bıə.

İyuni 27-28-ədə Qəncədə 70 sinninə zənəni ıştən ehaştışe. Minqəçevir mərizxonə soədə 1 nəfər merd xəyləği bəştə vəş jəşe. Əmo çey jimon xilas kardəşone. Həmonə ruji Boku Pirşağa ğəsəbədə, 2 ruji bə çəton Səlyoni Kolani diədə intiharə hadisə bıe.

Im iyunə manqi 14 rujnə məlumate. Əmandə rujon barədə məlumat ni. Hokumətən bı barədə nə qıley monitorinq bardedə, nəinki hiç qıley rəsmi məlumat dodəni.