Az.R şəhrıvandon ən vey bə İron səfər karde səbəb çiçe?

Sosialə medionədə İroni de Az.R quya deşmen bıe barədə bə təxribatiə qəpon rə-rə rast omə bedə. “Tolıshmedia.com” sayti bə ım məsələ qıley məğalə həsr kardəşe.

Bə jiqo fikiri təbliğ kardə odəmon nəzə rosniəşe ki, çəmə Respublika şəhrıvandon ən vey səfər kardə xariciə məmləkət məhz İron İslamə Respublikay. Çıvrəyku bə xaric səfər kardəkəson 40% bə İron, cəmi 10 % bə “bəradərə” Türkiyə səfər kardedən. Hejo iqlə ım fakt çe Azərbaycani xalği həğiğiə dusti kii bıe  oşko nişon dodə.

Azərbaycani Devlətə Statistika Komitə bə 2019-minə sori yanvariku tosə aprelə manqi dair məlumatədə elan kardışe ki, bə xaric səfər kardə şəhrıvandon miğdar bə ponə sori muvafiğə devri nisbətədə 27% ziyod bıə, bə 1 milyon 636 həzo nəfəri rəsə. Çəvon  40% bə İron, 27% bə Qurciston, 18% bə Rusiya, 10 % bə Turkiyə , əmandənə 5% isə bə co məmləkəton səfər kardəşone. Bə nəzər bısənəmon ki, bə Qurciston və Rusiya şəkəson əslədə bə səfər ne , bəştə kə və bə valideynon tono şe-omə kardedən. Imsor çe Respublikaku bə İron şə şəhrıvandon miğdar 73%, bə Qurciston şəkədon miğdar 10% , bə Rusiya 6%, bə Turkiyə isə cəmi 1,2% ziyod bıə.

Təhlilqər Natiğ Cəfərliən bə “Sputnik Azərbaycan” sayti votəşe ki, bə İron şəkəson miğdari ziyod bıe 2 qılə səbəbış heste. Əvvəla, İronədə əmttəon erjon bıe, Azərbaycani şəhrıvandonku bə İron bo ticarət karde ro şe stimul bə əməl vardedə. Dıminə səbəb isə ıme ki, bo mualicə ro şedən .Çunki, İronədə səhiyyə xidməti səviyyə bə Az.R nisbətədə xeyli barz, həmən erjone.

Əlavən ğeyd karde bə vırə ebəqıne ki, İroni rəhbəriyyəti bo Az.R şəhrıvandon viza rejim ləğv kardəşe. Dəvardə rujonədə Prezident Həsən Ruhani bə İron səfər kardə xariciə şəhrıvandon pasporti piçat je ğaydəşən çe arə peqəte ki, Amerika rejim bo jiqo odəmon mışğıl bə meydon nıvardo.