“İnsonə orqanon transplantasiya karde həxədə” ğanuni tojə layihə keynə ğəbul bəkarden.

Boku Qonə Cinayəton məhkəmədə de insoni orğanon həvate əlağədar məhkəmə proses dəvom kardedə. “Tolıshmedia.com” sayt xəbə dodə ki, Ağdam rayoni sakin Vahid Xudadadov bə ğeyri – ğanuniə transplantasiya rəvoc doeədə ittiham bedə. Zərərdidə Vəli Suleymanovi məhkəmədə ifadə doəşe ki, 4500 dollar kreditə ğarzış bıə. Ey oqırdınie ro imkanış bıə ni. Bə səbəbən bə ğəror omə ki, ıştə i qılə veki bəhavato.

Samux rayoni əji Sarvan Məmmədoviən məhkəmədə votəşe ki, çey 4 sinninə kinə talassemiya noxəşine. Bo çey dəvocati se ro imkanış nıbe qorə ıştə i qılə veki bə 8 həzo mənot bə Xudadatovi həvatəşe. Bey hiç qıley iddia və noroziəti nişe.

Az.R-ədə “İnsoni orqanon transplantasiya karde həxədə” ğanun 1999-minə sori ğəbul bıə. Dəvardə 20 sorədə cərrahiyyə anədə inkişaf kardəşe ki, bə mərizə insonon salemə orqanon ovoştıniə əməliyyaton hevujə vusət səşe. Çimi nəticən əve ki, ısət bə insonə orqanon tələbat xeyli ziyod bıə. Əmo Respublikadə 1999-minə sori ğəbul bıə həmonə ğanun bə ım tələbon cəvob doe holədə ni. Bə səbəb ki, ə ğanun bə mərizə odəmi iqlə cey əvlodon orqani ovoştınie icazə dodə.

“Sputnik Azərbaycan” xəbə dodə ki, insonə orqanon ovoştınie həxədə ğanuni tojə layihə hozo beədə cərrah-transplantoloq Mircəlal Kazımi`ən İştirak kardəşe. Ey bə sayti muxbiri xəbə doəşe ki, ım ğanunədə bə pasienton həmən vəfot kardə odəmon orğanonən ovoştınie,  vəfot kardə odəmon orqanon çəvon əvlodon roziyəti bəpeş bo transplantasiya ro bekarde və həniən co əlavon  nəzərədə qətə bedə. Və dəvardə sori ım əlavə və əvəzon bə Milli məclis təğdim kardəşone.

Həmən ğeyd karde lozime ki, Respublikadə insonə orğanon ğeyri-ğanuniə transplantasiya mafiya mevcud bıe həxədə şaion nəvedə. Boku Qonə Cinayəton Məhkəmədə çe Xudadadovi muhakimən həmonə mafiya kardə əməlon məqəvuji qıləy xoləy.